Chelsea len chilh tur PSG

Parc des Princes-ah Paris Saint Germain leh Chelsea 1-1 in an inhnehtawk a, zanin dar 1:15 hian Stamford Bridge-ah quarterfinal lut tur an zawng dawn.

Chelsea-in goal an chhuah loh chuan quarterfinal an lut thei dawn a, thil awlsam tak erawh a ni lo ang.

Defence thiam vs attacking ṭha
Chelsea manager Jose Mourinho hi defence remkhawm thiam hmingthang a ni a, game mawi tak khelha chak loh ai chuan tlar hnung in rem ṭhat a counter attack chhawr ṭangkai duh ṭhintu a ni. Chelsea defender-te hi tlar hnungah an khawng a ni mai lo a, goal an khung thei tel bawk.

Away goal khat nei sa an ni tih hre chungin Chelsea-in an khel ang a, PSG-in goal khung ngei an tum thung ang. Chelsea defender khawng tak tak John Terry, Branislav Ivanovic leh Felipe Luis te hi PSG tlar hma Zlatan Ibrahimovic leh Edison Cavani te hoin sut hawn an tum tur hi a en tlak khawp ang.

Chelsea team balance a ṭha a, tlar hma lamah Diego Costa, Eden Hazard te leh ball sem thiam Cesc Fabregas te an kawl a. Anni hi eng team tan pawh hmachhawn a châkawm loh. An khingpui tur PSG tlar hnung an duai bik lo, Brazilian defender ṭha Thiago Silva leh Chelsea defender hlui David Luiz te hi eng team tan pawh thlamuanpui tham an ni.

Khel ṭha tluang pahnih
Tun hnaiah team pahnihin result an nei ṭha ve ve. Chelsea-in competitive match riat chhung chu hneh loh an tawng tawh lo.

Laurent Blanc-a naute hi an duai bik lo. Tunhnai match 14 chhung chu hneh loh an tawng tawh lo a, an khel ṭha tluang lai hi Chelsea tih tawp tir an tum hauh lo ang.

Champions League bika an match hnuhnung parukah Chelsea-in vawi li hnehna an chang tawh a, vawi hnih an khingpuite an hnehtawk bawk. 

PSG in Champions League-a an match hnuhnung parukah vawi li hnehna changin vawi khat an chak lo a, vawi khat draw an nei bawk.

Chelsea hian quarter-final an lut a nih chuan Champions League quarter final kum nga chhunga vawi li an luhna tur a ni.

PSG zawk hi an tlang a nih chuan kum thum chhunga a zawna Champions League quarterfinal an khelhna tur a ni bawk.

1-1 a an inhnehtawk chuan penalty hmanga chak zawk zawn a ngai dawn a, hei hi Chelsea lam hian an chak zawk zawk lo ang. UEFA competition-ah penalty shootout vawi li an pet tawhah vawikhat chiah a chak zawkah an la ṭang a ni.

Chelsea leh PSG hi inchhuan khum thei an awm lo a, vawi nga an intum tawhah vawi khat ve ve chakin vawi thum an inhnehtawk a ni.

Eng nge an sawi?
Chelsea defender Gary Cahill chuan, "PSG hi team ṭha tak an ni a, an theihna hi kan hrechiang em em a ni. Kan theihtawp chhuahin kan khel ang. Kan tan chuan he match hi final ang mai a ni a, chak ngei ngei a pawimawh a ni,"  a ti.

Chelsea defender hlui tuna PSG-a khel ta David Luiz chuan, "Jose Mourinho hi kei chuan mi bik a nihna ka hre lo. Nangni chuan 'The Special One' inti a ni maithei a, ka tan chuan a ni ve lo. Chelsea-ah khan hun duhawm tak ka hmang a, title tam tak lain ka hlim em em a ni. Tun season-ah pawh an khel ṭha em em a, an khelmuala hneh a harsa ang. Mahse, kan team hi ka hrechiang tawk a, chak turin theihna kan nei a, goal thun ngei kan tum dawn a ni," a ti.


Share this Post

Login to comment
No Comments