Vanglaini-in India Football coach Constantine a kawm

Stephen Constantine hi football ngainatu tan hriat loh a thiang lo - India ram football coach a ni.

English coach hian India coach a nih hmasak ṭumin Mizo rawlthar duhawm Malsawma leh Jerry Zirsanga te India senior squad a ko tu hi Vanglaini palaiin kawmna hun ṭha kan nei thei hlauh. Mizoram Premier League en a tum leh tum loh chungchanga kan zawhna min chhansakte leh India enkawl a tum dan kan palai hnena a phawrhchhuah te chu chhiar rawh le.

# Coach tam takin vawi khat an lo enkawl tawh National team enkawl nawnna hun ṭha an hmu ngai lo. Nang erawhin a vawi hnihna atana India coach tura ruat i ni a, 'chona' hi engtiang taka phurawm nge nia i hriat?

Vawi hnihna atana India coach a min ruat hi ka lawm takzet a ni. India a ka lo kal hmasak zawk pawh khan chona phurawm tak hmachhawn chungin ka rawn kal a, tunah pawh hian a hmasa zawk ang chiah khan kawng tam tak thlirin he 'chona' hmachhawn hi a phurawm ka ti takzet a ni. India coach ni tura vawi hnih ruat nawn awm chhun ka ni hi ka inchhuang takzet bawk.

#Engtiang chiahin nge India squad hi tih chak i tum? Kan lo hriat danin  I League chauh ni loin player zawn nan Santosh Trophy i hmang tel dawn nin kan lo hria a. State league ṭhenkhat, player ṭha tak tak an khelhna Mizoram Super League-te hi player zawn nan en tumna i nei em?

Nakin hun zel tur ngaihtuah chunga 'team' siam hi tihdan phunga ka lo neih ṭhan a ni. Mahse, hma lam thlir chunga 'team' siam hi a hautak em em mai a, coach nih vanduaithlak ve deuhna chu kan bul ṭan rah keimahnin kan seng hman ngai lo hi a ni.

Malawi coach ka nih lai khan hetiang chiah hian 'squad' ka din a, ka ban hnu kum khatah 'Africa Cup of Nation' ah an inhlangkai nghal a, Sudan ka enkawl ṭum pawhin hetiang chiah hi a thleng a ni.

India a ka hun hman hmasak zawk kum 2002-2005 inkar kha in thlir kir chuan hetiang deuh tho hi a thleng leh a ni. Nakin hun ngaihtuah chungin 'team' ka din a, khatih hunlaia ka U19 player-te khan India ram chhungah trophy an chawi mai bakah 2011 Asian Cup an khel leh bawk. Hma lam hun thlirin 'team' ka din ṭhin a ni.

Tun dinhmuna players kan dap khawm dan tur kan duanah chuan India ram chhung kil tin hi hrutchhuah vek kan tum a ni. Scout tam tak Hero I League leh Hero Indian Super League mai bakah State League-te en ṭhin turin ka nei dawn a ni. Talent nei ṭha tak tak player an hmuhchhuahte chu ka hnenah an rawn thlen ṭhin ang a, India ram zau taka talent nei ṭha tak tak player-te hi hmuh hmaih kan tum lo.

School, University leh Football Academy hrang hrang a talent tam tak pawh haichhuah ka duh a, India mi India ram tana khelh chak te chuan hun ṭha an hmu vek tur a ni. Player hrang hrang dinhmun enna tur 'database' pawh siam kan tum a ni.

#North East player te i hmuh dan min hrilh thei em?

North East a talent tam zia ka ngaihtuahin kei chuan North East hi rangkachak khur ka tehkhin hial a ni. Mahse rangkachak khur neih ringawt hi a tawk lo a, rangkachak lai chhuak tur chuan lei i laih a ngai a, lei i laih lai chuan lung tam tak i thenfai a ngai bawk a ni. Chumi hnuah rangkachak chu i hru fai anga, i nawt tle bawk ang a, a nih tur ang tak a ni chauh ang.

North East-ah hian players talent nei ṭha tak tak an tam em em a, kan mamawh awmchhun chu anmahni zawnchhuaha an theihna te ti pung lehzual tura puih a mi hriat tura tarchhuah hi a ni.

North East aṭang hian players ṭha tak tak an lo chhuah tawh ṭhin avangin players tam zawk North East aṭang hian kan la neih belh theih ka beisei tlat a ni.

#India Super League i hmuh dan min hrilh thei em? India player-te tun aia ṭha zawk turin he league hian a puiin i hria em?

Hero Indian Super League aṭanga lang chiang em em mai chu Indian ho hian cricket an ngainat ang bawkin football pawh an ngaina a ni tih hi a ni. Nitin professional player ṭha tak tak nena training na hun ṭha Indian player ten an nei ringawt pawh kha a ṭha em em a, marquee player-te aṭang khan tam tak an zirchhuak thei bawk a ni. ISL hi Indian player ten an ṭhatpui ngei a ngai a, an ṭhatpui reng bawk in ka hria.

#Bengaluru wing back Lalchhuanmawia leh winger Beikhokhei-te tun season-ah an khel ṭha em em a, heti taka khel ṭha chung si a National team-ah koh an ni lo hi a chhan min hrilh thei em?

Kan hma lawka match hnih khelh tur atan players 50 kan thlangchhuak chhin phawt a, hengho kan thlan lai khan kei chuan players ka la hriat mumal hlawm loh avangin ka inrawlh lo. Thutlukna tak tak ka siam ve hun tur chu player 26 te nena Guwahati a kan camp hunah chauh a ni ang.

India coach tura ruat ka nih leh game kan khelh tur hi a inhnaih em avangin players tumah kei chuan ka zirchiang ve hman lo a, midang ka rin a ngaih phah a ni. Player pahnih khat koh phu tak tak koh loh an awm ang tih ka ring. Mahse, kan game hmasa pahnih zawhah hi chuan player-te ka hrechiang tawh ang a, zirchianna hun ka nei ve tawh ang.

Lalchhuanmawia leh Beikhokhei bakah players dang tam tak pawn an club tan ṭha taka khelh chhunzawm zel an mamawh a ni. Theihna leh chakna an neih a ngai - chu chiah chu kei chuan ka mamawh a ni. Ka mamawh ang an neih phawt chuan koh an la ni em em ang.

Tunge Constantine chu?
India Football Coach Stephen Constantine hian kum 2002-2005 inkarah India a  lo enkawl tawh a, India a enkawl hmasak ṭum hian a che ṭha hle.

Kum 2002 khan India chu kum 1974 hnua ram pawna trophy an chawi hmasak ber chawi puiin Vietnam-ah LG Cup-ah a champion pui a, kum 2003-ah Afro-Asian Games khelin silver medal a lakpui leh bawk. He games-a an final kalkawngah hian India chuan Rwanda leh Zimbabwe an hneh a, hetihlaia  Zimbabwe nena an ranking inthlauhna hi rank 85 zet a ni. Final-ah Uzbekistan 0-1 in hneh lo mah se Constantine chu November,2003-ah AFC Manager of the Month-ah puan a ni nghe nghe.

Constantine hian India a enkawl hmasak zawkah match 21 chhung a enkawl hman a, vawi ruk chakin vawi sawm a chak loh pui a, vawi nga an khingpuite a draw bawk.

A vawi hnihna atana India a enkawl hma hian Rwanda national team a enkawl a, December 2014 khan Rwanda chu FIFA ranking-ah 68 na a nihpui a, hei hi Rwanda in FIFA ranking-a a tawn san ber ṭum a ni.

Kum 2011-a Best English Manager/Coach of the Year Abroad dawngtu hian national team panga enkawl tawhin Nepal, Malawi, Sudan, Rwanda leh India te a enkawl tawh. Club coaching lamah pawh tawnhriat a nei ṭha a, Cyprus club Nea Salamis Famagusta FC leh APEP F.C. te chu a chet ṭhat pui hle a, English club  Millwall leh Bournemouth-ah te pawh first team coach hna  a lo chelh tawh a ni.


Share this Post

Login to comment
No Comments