Real an tan a awlsam tawh

UEFA Champions League champion lai Real Madrid-in kartawpah Athletic Bilbao an hneh loh avangin La Liga-ah Barcelona hnuaiah an awm a ṭul a, Europe inelnaah an tlu sawp lo tih lantir dawn.

Real Madrid hian zanin dar 1:15 hian Santiago Bernabeu-ah Schalke an mikhual dawn a, Germany-a 2-0 a an hneh tawh avangin Spanish club tan quarterfinal thlen a harsa tawh lo ang.

Veltins Arena-ah Cristiano Ronaldo leh Marcelo te'n goal an khung a. Germany club-in quarterfinal thleng turin goal thum thun bakah goal chhuah loh a ngai dawn a, an khingpui tur hi champion lai an ni a, an khelhna tur hi Santiago Bernabeu a ni.

Real Madrid-in match hnuhnung pahnih chak result an hlawhchhuak lo. La Liga-ah Villarreal an draw bakah Bilbao an hneh lo. 

Club pangngai tan chuan vawi hnih chak zawh loh hi 'tlachhia' a puh chi a  ni lo maithei, mah se club ropui leh khawvela player ṭha ber ber awmna Real tan chuan vawi hnih chak result hlawhchhuah zawh loh hi 'mualphona' a ni. 

Schalke hi an game hnuhnung pangaah inchhuang thei an awm bik lo a, vawi khat chiah an chak a, vawi thum an tlawm a, vawi khat an in draw bawk. Amaherawhchu Real an tum hma an match hnuhnung berah Hoffenheim 3-1 in an hneh a, inrintawkna an neih phah ngei ang.

German club Schalke hian Champions League-ah Real Madrid nena vawi thum an inkhelh tawhah Spanish club Real-in chakna an la chang vek.  Season hmasa khan last 16-ah an intawng a, first leg Schalke khelmuala khelhah Real hi 6-1 in hnehna an chang a, Bernabeu-ah 3-1 in an chak leh bawk. 

Schalke ngamtu Ronaldo
Real Madrid player ṭha rual zingah Ronaldo chu Spanish club ingnghahna tur a ni. Portugal captain hian Schalke hi a ngam hrim hrim a, vawi thum an inkhelh tawhah goal nga a khung tawh.

Schalke tan Real forward ven uluk hi an tih makmawh tur a ni. 

Real Madrid tan defender pawimawh Sergio Ramos leh winger James Rodriguez te inhliam vangin an khelh theih a rinawm loh a, Luka Modric dinhmun a la chiang lo. Croatian midfielder hi game thlak danglam turin Real-in mamawh takzet. www.vanglaini.org

Schalke lamah an player pawimawh Julian Draxler hliam a la dam lo a, Jefferson Farfan a khel thei dawn lo bawk.

Eng nge an sawi
Real Madrid boss Carlo Ancelotti chuan, "Mimalin kan khel nasa lutuk a, player inhriatthiam tawnna a awm lo. Goal tam tak kan khung avangin Real Madrid tlar hmaah harsatna a awm tih hi awih a harsa khawp ang. Amaherawhchu awih a ṭul a ni. Tlar hma pathum an che ṭha tawk lo a, an thiam loh erawh a ni lo. Team angin kan nawr a ṭul a ni," tiin Bilbao an hneh loh ṭumin a sawi.

Schalke hmachhawn hmain Real Madrid hian ni hnih chhung inzirna hun an nei a, an hman ṭhat leh ṭhat loh chu zaninah a chiang ang.

Schalke coach Roberto Di Matteo chuan, "Spain-a Real Madrid hneh tur chuan duhthusama kan khelh a ṭul a, an khelh chhiat kan nan fuh a ngai bawk. Kan vanneih ngei ka beisei," tiin a ṭawng pawr ngam lo.


Share this Post

Login to comment
No Comments