MFA Cup champion Aizawl FC Junior

MFA Cup vawi 19-na final-ah nimin khan Aizawl FC Junior chuan Lunglei club Zotlang FC chu hun pangngaiah goal awm loa an inhnehtawkpui hnuin penalty shootout-ah 3-2 in an hneh.

Aizawl District aiawhin Aizawl FC-in an club history-a a vawi khat nan coach Rohmingthanga hoin MFA Cup nomawi an chawi a, Zotlang FC erawhin kum 11 liam taa Lunglei club-in nomawi an chawina hmun Lawngtlaiah nomawi an chawi nawn thei lo.

Ṭan phat aṭangin inkhel a nung nghal a, Zotlang FC-in Vanlalhlua hmangin chance ṭha nei mah se hmanhmawh luatah engmah loah a chantir. Minute 11-na lekah Aizawl FC Junior team tan khawtual tlangval  K. Lalremmawia chuan keeper Lalremruata chauh a hmachhawn a, a pet over. Hemi hnu lawk hian Augustine Lalrochana pawhin keeper chauh a hmachhawn hnuah goal zawnah a pet thei lo a, AFC rawltharten an hun ṭha neih an hmang ṭangkai lo.

Aizawl FC Junior an khel ṭha chhunzawm a, Zotlang goalkeeper Remruata'n ṭum khat aia tam ball kal chak zawng a chhutsual avangin Lunglei club tlarhnung a nghing a, goal erawh an hum him hram hram. Second half-ah Zotlang FC inkhel a kâng hret a, chance ṭha bik insiam thei lo mah se MS Dawngliana cross erawh a goal teuh hle. Hun tawp lamah erawh AFC Junior bawkin chance ṭha an ngah a, Lalnunzira Sailo pet chu Lunglei keeper Remruata'n a dan sak a, injury time-ah Lalchungnunga ball petin crossbar a per a, pakhat zawk pawh goalline aṭangin Zotlang player-in an pet chhuak hman a, hun pangngaiah goal a lut lo.

Extra time-ah Lunglei club-in chance an nei ṭha zawk a, Lalrintluanga ball pet chu goal ban hrulin goal pawnah chiah a kal a, T. Biakhluzuala freekick pet pawh AFC Junior keeper Samson Lalremruata'n a beng chhuak hram bawk.

Second half-ah Zotlang FC bawkin chance ṭha bik an nei a, Lalrintluanga'n ven loha awm Vanlalhlua pe duh loin goal-ah a pet a, AFC Jr keeper Samson-a'n a dang hram. Goal inpe loin extra time a tawp.

Penalty chu 

Penalty shootout-ah Zotlang FC-in an pet hmasa a, MS Dawngliana leh M. Lalrintluanga ten an khung nghal. Aizawl FC Junior tan pet hmasa bertu PC Lalhriatpuia'n penalty hlah mah se Lalruatfela, Lalfelkima leh Lalchungnunga ten an khung vek.

Aizawl FC Junior tan keeper Samson-a chu 'hero' a ni a, Zotlang tana Allan Lallawmsiama leh Lalrintluanga te penalty pet a dang a, T. Biakhluzuala'n goal zawnah a pet lo thung.

Aizawl FC Junior, Aizawl District 

Group Match

FC Rengkhawpui    0 - 3    Aizawl FC Junior

AFC : PC Lalhriatpuia 73'; Hmangaihzuala 74'; 

   Lalchungnunga 77'

Aizawl FC Junior    8 - 1    Siahatla FC

AFC : David Lalhlansanga 28', 39', 56', 78', 89'; 

    F.Hmangaihzuala 32'; Ramngaihsanga 31' ; 

   Lalruatfela 51'

SIA : Lalchhanchhuaha 75'

Aizawl FC Junior    4 - 0    FC Serchhip Kawnpui

AFC : Lalnunzira Sailo 12'; Lalchungnunga 44'; 

    PC Lalhriatpuia 82', 90+3'

Aizawl FC Junior    2 - 1    Kahrawt FC

AFC : F.Lalhmangaihzuala 7'; David Lalhlansanga 26' 

KFC : F. Lallawmkima 78'

Aizawl FC Junior           0 - 0 (a.e.t)    Zotlang FC

Penalty Shootout-ah Aizawl FC Junior 3-2 in an chak

Penalty Pet Dan

* Zotlang FC-in Penalty an pet hmasa

Aizawl FC 

PC Lalhriatpuia    X

Lalruatfela    G

Lalfelkima    G

Lalchungnunga    G

Zotlang FC 

MS Dawngliana    G

M. Lalrintluanga    G

Allan Lallawmsiama    X

T. Biakhluzuala    X

Lalrintluanga    X