Santosh Trophy NE Zone Qualifying Round Meghalaya-in Mizoram an pet tla

Santosh Trophy North East Zone Qualifying Round-ah nimin khan Meghalaya chuan Mizoram 1-0 a hnehin final round an lut a, 2014 champion Mizoram erawhin nikum finalist Kerala leh West Bengal hnung zuiin final round thleng loin an tla.

Mizoram leh Meghalaya ten an inhmachhawn hmain 3-0 ve vein Tripura an hneh a, hei vang hian nimin inkhel hi 'final' ang maia pawimawh a ni. Coach Lalsangzuala Hmar hote match pawimawhah an khel ṭha tawk lo a, mikhual team-in minute 31-naa Kynsaibor Lhuid freekick hmangin hnehna an chang.

Meghalaya-in bul an ṭan ṭha zawk a, freekick hmangin Mizoram tlarhnung tan buaina an siam. Minute 12-na lekah captain Brolington Warlarpih freekick pet chu Mizoram keeper Zothanmawia'n dang perin hnai tak aṭangin Tripura laka goal hnih khungtu Donald Diengdoh-a'n a pet over.

Mizoram pawhin chance an insiam ve thuai a, MC Malsawmzuala'n a chance ṭha neih chu a tauh over. Amaherawhchu, freekick hmang bawkin Meghalaya an hlauhawm a, goalline bula buai nuaih karah Mizoram defender Vanlalzuidika'n a pet chhuak hman hlauh.

Meghalaya-in freekick hmanga vawi thum Mizoram an rum ṭhaihnaah goal a lut ta a, Kynsaibor Lhuid chuan yard 20 vel aṭanga hla aṭangin goal kilah tak a pet lut a, keeper T. Mawia tan dan theih rual a ni lo.

Goal khat a luh chiah hian Mizoram hi tla thei dinhmunah an ding a, Meghalaya hian inkhelh hmabakah goal an venghim thei a nih chuan final round an lut dawn.

Goal luh hnuah Mizoram an talbuai a, game rang awmze nei khel loin an 'phili' a, Meghalaya-in hun khawhral dan an zawn bawk avangin Mizo player insum zo loin ṭul loah an thinrim a, inkhelah a nghawng a lang.

Mizoram hian first half-ah chance awmze nei an insiam thei lo a, second half-ah an ṭha sawt - midfielder KC Larchhuakmawia leh Vanlalbiaa Chhangte te an lut a, an nung thar hle. Midfield aṭanga KC-a ball pek chu Mabiaa hian ṭha takin a cross a, MS Dawngliana'n hnai tak aṭangin a tlawh over.

Amaherawhchu, Meghalaya tlarhnung an inrem phui ṭha a, ISL leh I League-a tawnhriat nei player an neihte an ṭangkai hle.

Mizoram hian goal khung theihna ṭha erawh an nei nual - captain PC Laldinpuia'n corner aṭanga ball per chu goal zawnah a hlap thei lo a, hun tawp hma hretin right back Immanuel HS Lalṭhazuala volley sual chu Lalromawia'n nang fuh mah se goal kham chungah a pet - Romawia hian chance ṭha ṭum hnih a hlah.

Meghalaya lamin counter attack hmangin goal khung theihna tur an nei a, an thluak a fim tawh bik loh avangin keeper T. Mawia an thleng pha lo. Chutihrualin tlarhnung erawh a tawp thlengin an rem phui a, Mizoramin an si phurh an sut thei lo. 

Mizoram defender Vanlalzuidika chuan hun tawp hamrik hnuah red card a hmu a, hei hian hun tawp lam inkhel boruak a sawifiah ṭha hle.

Mizoram coach Lalsangzuala Hmar chuan, "Kan fimkhur loh vangin ṭul lo takah freekick kan chawi a, kan tuar a ni. Kan chance ṭha neih goal zawnah kan pet thei lo a, chak kan phu lo," tiin an khelh ṭhat loh thu a sawi.

Under 21 player vanga an harsatna sawiin Sanga chuan, "Khelo India an khelh avangin training an zawm tlai a, kan game plan an hre thiam hman lo. Santosh Trophy danah player pathum kher hman a ngai si a, kan tawrh phah ta a ni," tiin Vanglaini a hrilh.

Meghalaya coach, AFC A Licence nei  Khlain Pyrkhat Syiemnlieh chuan, "Football-ah chuan hetiang hi a thleng tur a ni a, referee kha chuan inkhel a thunun lo. Chutihrualin ka player-te leh Mizo player-te chet danah thil thar a awm lo a, football-ah chuan hetiang hi a thleng fo a ni," tiin hun khawhral leh insum zo lo an awm ṭhin thu a sawi.

Khlain chuan, "Mizoram ngeia a thlengtu hneh chunga final round luh chu a lawmawm hle. Hmarchhak aiawh kan nih angin result ṭha tak neih zel kan tum ang," tiin Vanglaini a hrilh.