Pochettino-a'n 2030 thleng US enkawl dawn

USA coach Mauricio Pochettino chuan a team enkawl lai chu chhunzawm zel turin contract thar a ziak a, Argentine coach hian 2030 thleng USA enkawl turin inremna a neihpui.

Kum 54 mi Pochettino hian September 2024 khan Stars and Stripes (USA sawina) hi a enkawl ṭan a, kum khat leh a chanve enkawl turin inremna thuthlung a zial a, kumin World Cup khelh zawh khan a contract hi a tawp chiah.

World Cup khelh zawh takah kha USA hi a thlengtu zinga mi an ni a, Poch-a hnuaiah beisei phak baka ṭhain an khel. Group stage-ah hmahruaitu ni chungin knockout round an lut a, round of 32-ah Bosnia & Herzegovina hneh lehin last 16-ah Belgium an lakah an vanduai thung.

Tottenham Hotspur coach hlui chuan, "Kum hnih liam ta chhung khan USA nen kan thawk ho ṭan a, World Cup chhung zawnga fan-te inpekna kan hmuh khan he rama thil thleng thei tam tak a awm tih min hriat thartir.

US football chhunga thil tam takah ka thiamna leh hriatna te hman a, player, coach te leh Federation chhunga team zawng zawng te kawng sial sak zel hi ka châk hle a ni. Min lo lawm em em tu he ramah hian hnuhma lian tak hnutchhiah kan duh a, field chhung aia thui thleng thei se kan duh a ni," a ti

PSG pawh lo enkawl tawhtu Pochettino hian a contract a hmang zo thei a nih chuan, Stars and Stripes hi World Cup dawt lehah a la kaihruai thei dawn a, chumi hma chuan CONCACAF Nations League leh Gold Cup khelh tur an nei dawn bawk.