City-in ka chungah rinna an nghat - Kovacic

Manchester City midfielder Mateo Kovacic chuan City chhuahsan tur anga sawi thawm mah se, Etihad Stadium chhuahsan tumna a neih loh thu a sawi a, "Club hian ka chungah rinna an la nghat reng a ni," a ti.

Kum 32 mi midfielder hian City-ah kum khat chiah khel turin contract a nei tawh a, he thu buatsaih a nih thleng hian contract thar zawrh a la ni lo - season hmasaah hliamin a tlak buak a, match kua chiah a khel.

Kovacic chuan, "Ka hma hun chungchangah buaina ka nei lo. Club nen kan inbia a, ka chungah rinna an nghah thu an sawi a, ka tan chuan thu hriat nuam tak a tling.

"A pawimawh ber chu ka khelh leh khelh loh chu ka chunga innghat a ni a, ka khel ṭha a nihte chuan manager-in min chhawr loh chhan tur a awm lo," a ti - City hi coach Pep Guardiola-a'n a chhuahsan tawh a, season thar aṭang chuan Enzo Maresca hoin inelna an hmachhawn ang.

City hian defensive midfield-a khel turin Tijjani Reijnders, Nico Gonzalez leh pound maktaduai 116-a Nottingham Forest aṭanga an lei Elliot Anderson an nei a, Kovacic te nen an inel dawn - Reijnders leh Nico hi chhuak thei an ni bawk.

Rodri-a'n a dam phawt chuan hmun a chang chiang a, mahse, Spain captain hi a hnung hliam zai a ni mek a, Real Madrid-in an ngaihven bawk - City chanchin pawh a ngaihnawm zel dawn.

Kovacic chuan, "Rodri nen hian kan khel dun fo a, a tel loin ka khel fo bawk. A awm loh lai chuan a hmun ruak ka lo luah thei ang - a lo kir hun nghah leh phawt erawh a pawimawh ber," a ti a, Rodri hmun ruak a hnawhkhah theih thu a sawi.