Diomande-a'n RB Leipzig training zawm lo

Real Madrid-a lut chiang tawh tur anga sawi Yan Diomande-a man chungchangah Real Madrid leh RB Leipzig an la inrem thei lo a, mahse, Ivorian forward hian Austria-a training nei mek Leipzig training a zawm ve rih lo.

Leipzig chuan Ivory Coast international zin ve loh chhan hi a damloh vang niin an sawi a, "Hei hian a hma hun a hril lo," tiin an sawi bawk. Leipzig coach Martin Demichelis pawhin, "A damlo tak tak a ni," a ti a, transfer nen inzawmna a neih loh thu a sawi.

Kum 19 mi Yan Diomande hi Liverpool chuan dawr hmasa ber mah se, an dawrna hnar a nih hnuah an inhnukdawk a, Paris St-Germain pawhin a man a to uchuak bakah, hlawh a phut hnem lutuk avangin an hawisan.

Madrid hian tun hnaiah German club hi dawr nawnin, euro maktaduai 120-in an dawr a, ruahman dan chuan €100mtd chu pek nghal tur niin, a bak hi a khelh ṭhat dan a zira pek belh tur a ni.

Hetihlai hian German club hian an man chhiar zat €130mtd hmuh an la inbeisei cheu nia sawi a ni a, hetihrual hian a khawi lam lam pawhin an inrem theih mai an inbeisei tho niin an sawi bawk.

La Liga club Leganés tan pawha lo khel tawh Diomande hian season hmasa khan Leipzig hi a zawm ve chauh a, €20mtd man niin, German club hian hlep hnem an tum hle!

Season hman zawh takah khan inelna hrang hrangah match 36 khelin goal 13 a khung a, assist vawi 10 a nei tel. World Cup-ah Ivory Coast tan a feh chhuak bawk a, a kum a la nau avangin hmabak êng tak a nei.