Chelsea-ah Hendo a chiang ta

Xabi Alonso hnuaia insiamṭhat tum mek Chelsea chuan player an lakluh belh zel a, Liverpool captain hlui Jordan Henderson chuan Stamford Bridge a pan ve leh ta - Hendo hian kum hnih atan contract a ziak.

English midfielder hian Liverpool captain a nih laiin Premier League nomawi a chawipui a, Champions League, FA Cup, League Cup (2), UEFA Super Cup leh FIFA Club World Cup-ah te champion nomawi chawi bawkin, champion theihnaah chuan a champion kim.

Kum 36 mi Hendo an la lut hi mi tam takin mak an ti a, mahse, coach thar Xabi Alonso-a'n tawnhriat nei ṭha player a duh miau avangin Hendo an la lut hi a mak lo - Danny Welbeck an lo la lut tawh bawk.

Hnar har Chelsea

Blues player thar Henderson chuan, "Chelsea lenzia kan hria a, manager thar Xabi Alonso hi ka ngaisang em em bawk. Player ṭha tak tak he club hian a kawl bawk a, ka tan chuan hnar phal chi a ni lo," tiin Blues a zawm chhan a sawi.

Hendo hian kum 2023 khan Liverpool chhuahsanin, Saudi Arabia lam a pan a, khatihlaia Steven Gerrard-a enkawl Al-Ettifaq a zawm. Mahse, Saudi-ah beisei angin thil a kal lo a, January 2024 khan Ajax a zawm.

Dutch club Ajax hi chhuahsanin, season hmasa ṭan dawn khan Brentford a zawm a, Premier League-ah a kir. Bees tan league match 32 a khel a, kum khat contract la nei mah se, a contract hi inhriatthiam tawnnaa titawpin, Blues a zawm ta a ni.

Theihtawp chhuahin

Hendo hian Blues-ah a contract a hmang zo a nih chuan, kum 38 a nih thlengin Premier League a khel dawn tihna a ni a, pui tak a ni - a kum tam tawh mah se, Chelsea chu a tikimtu ni tura zawm a nih loh thu a sawi zui.

English midfielder chuan, "Ni tinin ka theihna zawng zawng, khelmual chhung leh pawnah, ka khelhpui te leh team tan ka hlan dawn a ni," a ti a, Chelsea tan player ṭangkai tak nih a beisei thu a sawi.

Sunderland aṭanga inzir chhuak Henderson hian November 1, 2008 khan Premier League-a a match hmasa ber chu Black Cats tan khelin Chelsea a hmachhawn a, EPL-a a match hnuhnung ber Blues tan a khel lo ang tih a sawi theih ta loh.

Player 10-na!

Chelsea-in season hman zawh takah khan Premier League table-ah 10-na dinhmun an luah a, European football an khel phak lo - season tharah insiamṭhat tumin hma an la a, Hendo hi tun nipuia player 10 an lakluhna chiah a ni nghal.

Blues hian an club player man to ber ni turin, Aston Villa midfielder Morgan Rogers chu pound maktaduai 117-in an la lut a, Strasbourg midfielder Valentin Barco (£34mtd), Crystal Palace centre back Maxence Lacroix (£52mtd), Atalanta fullback Marco Palestr (£42mtd) leh Sporting Lisbon winger Geovany Quenda (£40mtd) te chu an player lakluh man to zual an ni.

Anni bakah hian Brighton striker Danny Welbeck (£5mtd) an la lut a, kum 23 mi striker Emmanuel Emegha (Strasbourg), kum 18 mi left back Denner (Corinthians) leh kum 17 mi striker Dastan Satpaev (Kairat Almaty) te an la lut tawh bawk.

Kum upa lam?

Blues hian engvangin nge player, kum upa lam an melh? tih chu zawhna awm thei a ni. Chelsea coach ban tak Liam Rosenior khan an squad-ah tawnhriat nei ṭha player an neih loh thu sawiin, an rilru a paukhauh tawk loh thu a sawi.

Rosenior chuan, "Referee thutluknaah emaw, lungawi lohna nei ta ila, kan chak duhna zawng zawng kan hloh nghal vek zel a ni," a ti a, result ṭha lo avangin Rosenior hi ban ni mah se, a thusawi erawh Chelsea thuneitu lamin an pawm hle.

Chelsea neitu zinga mi Behdad Eghbali chuan, "Ruahmanna kan nei a, mahse, a hlawhtlin loh chuan kan siam rem mai tur a ni. Kan tum ram min hruai thleng turin tawnhriat nei ṭha player kan mamawh a, a pawimawh ber chu kan tihsual aṭanga inzir a ni," a ti a, player naupang hlir an lei chu an tisual tih a pawm.

Hendo & Welbeck

Blues boss Xabi Alonso chuan team-ah chuan a pawimawh ber chu 'balance' a nih thu sawiin, "Kan mamawh ber chu 'balance' a ni a, kum 20, kum 30 leh a inkar thlengin kan mamawh," a ti a, team chu naupang rual hmang ringawta din theih a nih loh thu a sawi.

Chelsea hian Hendo hi khelmual chhungah mai ni lo, training ground-a player naupang zawkte kaihruai a, fuih turin an mamawh tel nia sawi a ni a, beisei phak lo player-te pawh hau ngam tur khawp niin an beisei.

Welbeck-a'n season hman zawh takah Brighton tan match 40-ah goal 14 khungin, a professional career-a goal a khung tam ber a ni! Khelmuala khel turin a la rintlak a, tawnhriat a nei ṭha a, midang a tiphur thiam bawk niin an sawi - Chelsea an indinthar zel e.