Rosenior-a'n Paris FC enkawl dawn

Chelsea coach ban tak Liam Rosenior chuan season thar aṭangin club enkawl a nei lehnghal dawn a, kum 41 mi coach hian Ligue 1 club Paris FC a enkawl ang.

English coach Rosenior hi France-ah a mikhual lo a, Chelsea a enkawl hma hian Blues neitu Blueco hnuaia awm tho, French club Strasbourg a enkawl ṭhin.

Blues-in Enzo Maresca nen an inṭhen hnuah London club enkawl turin an la lut a, bul ṭan ṭha viau mahs e, result chhia leh team boruak chhia a awm chho a, April-ah khan ban a ni.

Mahse, tunah chuan France lamah a kir dawn ta a, kum hnih chhung atan contract ziakin, kum khat dang pawhsei theih tura tih a ni - Antoine Kombouare a thlak dawn a, season hmasa khan Ligue 1-ah 11-na niin season an khar.

Paris FC hi France sumdawng hausa Arnault chhungkaw ta niin, an chhungkaw hausakna belhkhawm hi dollar tluklehdingawn 230 vel a tling anga sawi a ni a, a tam tham hle - Red Bull chuan share an nei ve bawk.

Ligue 1 club hian hmathlir thui tak an nei nia sawi a ni a, Rosenior an lakluh chhan chu, "Level sang taka tawnhriat nei ṭha a nih vang a ni a, player naupang zawk enkawl a thiamin, football hmuhnawm tak a pho chhuak ṭhin a ni," an ti a, beiseina an nei sang dawn.

Rosenior hian Chelsea-ah beisei phak lo mah se, Strasbourg a enkawl lai khan 2024-25 season-ah Ligue 1-ah pasarihna a nihpui a, European top five league-a squad nei naupang ber ni chungin, UEFA Conference League khel turin a hruai kai thei a ni.

France lama a hming a chher hma hian, Brighton & Hove Albion Under-23 enkawlin bul a ṭan a, Derby County-ah Wayne Rooney-a assistant niin, Hull City a enkawl tawh bawk.