Rodri-a'n World Cup zawhah hma hun tifel dawn

Manchester City midfielder Rodri chuan a awm zel dan tur chu World Cup zawh lamah chinfel a tum thu a sawi a, a hma hun a chian loh chhunzawm zel - Spanish midfielder hi Real Madrid nen sawizawm a ni.

Rodri hian Real tana khelh a châk thu a lo sawi chhuak tawh a, khatihlai khan City coach Pep Guardiola chuan a player chu City-a a cham reng a beisei thu a sawi. Mahse, Pep zawk hian City a chhuahsan a, a fachuam Rodri hma hun a chiang lo ve nghal.

Spain international hian City-ah kum khat dang khelh chhunzawm turin contract a nei a, June 7-a Real Madrid President thar tur thlannaa chuh tur pakhat, presidential candidate Enrique Riquelme chuan President-a thlan tlin a nih chuan Rodri hi lakluh a tum tur thu a sawi tawh.

Mahse, Rodri chuan, "Kan hma lawkah World Cup-in min hmuak a, tuna ka tih tur chu World Cup chauha ka rilru pek a ni. Ka hma hun chu World Cup zawh lamah kan la ngaihtuah ang chu," a ti a, ram tana inlan chu a ngaih pawimawh hmasak thu a sawi.

Rodri hian kum 2019 khan Atletico Madrid chhuahsanin City hi a zawm a, Premier League-ah ringawt pawh vawi li champion pui tawhin, Champions League nomawi vawi khat a lakpui bawk.

Kum 2024 khan khawvela footballer ṭha berin an dawn ṭhin Ballon d'Or a dawng hial a, mahse, September 2024-a a khup hliam avangin a vanglai ang tak chuan a khel leh tawh rih lo.

Rodri chuan, "Player-te kan contract tawp lam kan hnaih tawh hi chuan thu leng vak hi a tam ṭhin hrim hrim a, mahse, chu chuan min ti chi ai hran lo. World Cup awm lo se chu, ka hma hun ka hrilh hial tawh ang che u," a ti a, USA, Mexico leh Canada thlen tur inelna lamah rilru a pe rih.