Austria-in kim loin Tunisia an hneh

Austria chuan Thawhṭanni zan khan hun tam zawk kim loin khel mah se, World CUp atana an inbuatsaihna friendly match-ah Tunisia 1-0 in an hneh. Marcel Sabitzer chuan goal awmchhun khungin, Tunisia-in a tam zawk an nihna an hmang ṭangkai thei lo a, a chhanletna tur an nei lo.

Ernst Happel Stadium-a inkhelah hian minute 36-na lekah Bayern Munich midfielder Konrad Laimer hnawhchhuah a ni a, Laimer hian Tunisia player te ball-in pass tur chu a kutin a dang a, match referee-in VAR a rawn hnuah a tiluiah ngaiin red card a phawrh.

Kim loa an khelh hnuah Austria chu a chungnung zawk an ni tho a, ball an chang hnem zawk. Minute 62-naah Stefan Posch-a cross chu Borussia Dortmund defender Marcel Sabitzer chuan a pet goal a, an chakna goal a ni zui bawk.

World Cup khelh nan ni riat chiah a awm tawh a, Austria hi group J-ah champion lai Argentina, Algeria leh Jordan te nen an awm ho a, group harsa pawla ngaih a ni. Mahse an inpuahchahnaah red card hmu chung pawha hnehna an chan theih avangin Ralf Rangnick-a hote an inringtawk sawt ang.