Real leh Barca-in Cucurella ngaihven

Spanish club lian pahnih Real Madrid leh Barcelona chuan Chelsea defender Marc Cucurella an ngaihven a, nipui transfer bazar inhawn hunah lak tumin an bei dawn niin khawthlang chanchinbuten an sawi.

Tun season-ah Chelsea-in Premier League-ah beisei an pha lo a, 10-naah season kharin season thara Europe-a inlan turin an tling lo. An chet ṭhat loh vang leh club chhung nuam a tih loh avangin, Cucurella-a'n Stamford Bridge chhuahsan a hreh lo nia sawi a awm.

Chelsea erawh an hlauthawng lo a, a chhan chu Cucurella hian nikum lawk khan contract thar a ziak a, kum thum dang la hman tur a la neih vang a ni. Cucurella hma lam hun turah thu chiang la awm lo mah se, a man atana an chhiar zat petu an awm a nih chuan Blues hian a chhuah an phalsak dawn thung..

Barca sporting director Deco chuan kum 27 mi Cucurella aiawhte a be pawp tawh a, head coach Hansi Flick pawhin Cucurella hi a iai lo niin a sawi bawk. Mahse Barca defender awm sate hi contract rei tak daih nei vek an ni a, Cucurella an lak dawn chuan an defender tu emaw ber an chhuahtir ve a ngaih hmel.

Real Madrid pawhin kumin nipui hian left back thar an zawng ve bawk a, Spanish defender hi an ngaihven hle. Mahse an dawr dawn leh dawn loh bakah an sum neih dan enfiah a la ṭul dawn.

Los Blancos hi nomawi chawi loa season hmang zo hlim an ni a, player te inkarah buaina a awm bawk avangin club boruak ṭhat lai ber a ni lo a, Cucurella tan luh a châkawm lo mai thei. Hei bakah hian Cucurella hi Barca player hlui a lo nih bawk avangin lakluh a harsat phah thei ang.

Real hian right back thar lak an duh bawk a, Tottenham Hotspur defender Pedro Porro leh Inter Milan right back Denzel Dumfries te pawh an ngaihven tel bawk. January thlaa Maresca-a'n Chelsea a chhuahsan kha Cucurella dinhmun tlahniam ṭan na a nih thu an sawi a, Cucurella Maresca an ban kha a pawmpui loh thu leh, club-in player naupang tak tak an lei nasa chu hriatthiam loh thu a lo sawi tawh. Hetihlai hian London chanchinbu ṭhenkhat chuan Cucurella hi Chelsea-ah a la nghet niin an sawi ve bawk.