CYMA Cricket 2026 : Ramhlun Venglai an ṭha, Durtlang an tla

Central YMA leh Cricket Association of Mizoram buatsaih 13th Inter-Branch YMA Cricket Tournament 2026-ah champion lai Ramhlun Venglaiin nomawi humhim turin an ṭha tawk tih an pholang a, inelna hnuhnung palia final lut vek Durtlang erawh an tla thung. CYMA Cricket 2026-ah last 16 khelh mek a ni a, vawiin hian inelna chhunzawm a ni ang.

Vawiin chhun dar 9:00 hian Lammualah Zemabawk leh Sihphir te an inkhel ang a, chawhnu dar 1:00-ah Champhai Venglai leh Ramhlun North te an inkhel ang. Team pali Chanmari, Luangmual, Ramhlun Venglai leh Chaltlang ten quarterfinal an lut tawh.

RVL an ṭha

Ramhlun Venglaiin CYMA cricket an thunun a, vawi 12 inelna neih tawhah vawi kua final an lut tawh a, vawi ruk an champion a, inelna hnuhnung paliah an champion bawk. RVL hian cricket inelna an la thutak a, tualchhung cricket-ah pawh an chungnung. Mahuma Memorial Cricket hnuhnung berah pawh RVL an champion a, veng hlang pawha Mizoram aiawh thei tur an ni.

Vaivakawn lakah pawh RVL an chungnung a, Johan Lalbiakkima'n ball 63 lekah run 138 a siam a, a tawp thlengin a dam. Mizoram captain Joseph Lalthankhuma pawh a lut hman lo a, RVL hian over 20-ah run 257 siamin wicket thum chauh an hloh. Vaivakawn lam tan RVL bowler-te an ṭha mah mah a, over 20 an dam tluan hram a, run 68 siamin wicket kua an hloh. RVL run 189 in an chak a, an ṭhatzia an nemnghet.

Durtlang an tla

Durtlang hian vawi khat chauh nomawi la chawi mah se vawi ruk final an lut tawh a, vawi nga an chak loh ṭum hian Ramhlun Venglai vek an hneh lo. RVL hi awm ta lo se, Durtlang hi record nei ṭha ber an ni thei hial ang.

Mahse, RVL an ropui zel laiin Durtlang erawh an tlahniam. Last 16-ah Durtlang hian Chaltlang hmachhawnin over 17.3-ah run 85 chauh an siam a, an thi fai vek. An player chhuanvawr Lalhruaizela pawhin run nga chauh a siam a, run siam tam ber Lalhriatrenga'n run 23 chauh a siam.

Chaltlang lamin beisei an pha bik lo a, Joseph Lalmuanpuia'n thi loa run 32 a siam zarah over 19.5-ah run 88 siamin wicket thumin an chak hram. Durtlangin bul an ṭan fuh loh an tuar a, Chatlangin 2007 final phuba an la thung.