Welbeck-a'n contract thar a ziak

Brighton & Hove Albion striker Danny Welbeck chuan thla 12 dang contract pawhsei theihna dan a neih chu tinungin, Premier League club-ah hian kum khat dang khel turin a contract a pawt sei.

Brighton manager Fabian Hurzeler chuan Welbeck chelh a duh thu hi ual au takin a lo sawi tawh a, coach berin a duh miau a, kum 36 a nih thlengin Premier League a la khel dawn tihna a ni.

Kum 35 mi forward hi a contract neih lai ang chuan, season tawp ruala contract hmang zo mai tawh tur a ni a, mahse, tunah chuan kum khat dang khel turin contract pawhsei a ni leh ta zawk.

Welbeck hian kum 2020 khan Brighton hi a zawm a, kum 2024 khan kum hnih dang khel tura contract ziakin, thla 12 dang pawhsei theihna dan a ziah erawh a hun lai hian puan zar a ni lo.

Mahse, a contract a zawh dawn meuh chuan English striker contract-ah kum khat dang cham belh theihna a lo awm reng tih a lang chhuak a, season tharah Seagulls (Brighton sawina) tan a la khel dawn.

Arsenal leh Manchester United tan pawha lo khel tawh Welbeck hian season duhawm tak hmangin, Brighton top scorer a ni mek a, tun season inelna hrang hrangah match 30 khela goal 11 khungin, assist vawi khat a nei tawh.

Welbeck hian season hmasa khan inelna hrang hrangah match 36 khelin goal 11 a khung a, season hmasaa a khung zat hi match ruka khel tlem zawk chungin tunah chuan a nih rual leh der tawh tihna a ni.

England coach Thomas Tuchel pawhin, tun hnaia che ṭha tak Welbeck hi a en thlak reng thu a lo sawi tawh a, tun ang renga a chet ṭhat chuan World Cup squad-ah a awm lo ang tih a sawi theih loh.

Welbeck hi Englnad tan vawi 42 inlan tawhin, goal 16 a khungsak a, mahse, ram tana a inlan hnuhnung ber hi kum 2018 daih tawh kha niin, Three Lions squad-ah a tel leh thei a nih chuan a ropui khawp ang.