Villarreal an che ṭha zel

Marcelino kaihhruai Villarreal-in result an neih ṭhat chhunzawm zel a, Pathianni zan khan Real Sociedad chu khualmualah 3-2 a hnehin, La Liga top four huangah an awm chhunzawm zel.

Villarreal hian Ayoze Pérez leh Alberto Moleiro-a goal hmangin, 2-0 in hma an hruai a, awlsamin an chak mai dawn niin a lang hman. Mahse, an beisei ang erawhin a kal vek bik lo.

Sociedad tan Carlos Soler leh Ander Barrenetxea ten si phurh an sut a, 2-2 a ni. Kum 23 mi Barrenetxea-a'n si phurh a sut hian minute 87 a ni tawh a, point an insem mai dawn niin a lang tawh.

Mahse, Villarreal-in chak loh an duh lo - kum 22 mi winger Moleiro chuan hun pek belhah a goal hnihna a rawn khung a, 3-2 in Villarreal an chak ta daih.

Season hmasa La Liga-a pangana Villarreal hian an league match hnuhnung pangaah hnehna an chang vek - hmahruaitu Barcelona chu point hnih chauha phak loin, table-ah pathumna an ni mek.