Roma hnehtu Napoli

Team lian dangten an chuhpui karah Napoli chuan Serie A nomawi an kawl lai chu hloh mai an tum lo. Antonio Conte naute hian Pathianni zan khan AS Roma chu 1-0 in an luhchhuah.

Roma an inveng thiam hle a, league match 12 an khelh china vawi ruk ngawt goal chhuah lo thei an nih avangin an tlarhnung a phui ṭha. Conte-a'n sut kuak dan a ngaihtuah nasa tih pawh a chiang hle.

Stadio Olimpico-ah inkhel a hmuhnawm a, chawlhlawk hma deuhin Napoli lamin counter attack hmangin an vaw let a, striker Rasmus Højlund siamsak chu David Neres chuan a khung a, goal dang lut loin an chak nan a tawk.

Italian manager Conte-a'n international break an hman zawh hnuah 3-4-3 hmangin a naute a remkhawm a, rang tak taka ball inpe kualin, Roma khelh dan nghet tawh tak chu an ṭhiat zeuh zeuh a, an hlawhtlin theih chhan pawh an inrem fuh vang niin a sawi theih.

Roma lamin second half-ah ball chang tamin an nawr let na viau ṭhin, mahse a tawp an thleng thei lo. Hun tawp dawnah Paulo Dybala chuan goal khung theihna remchang ṭha nei mah se Vanja Milinkovic-Savic chuan a lo dansak a ni.

Hnehna changtu Napoli hian point 28 hmuin Serie A table-ah pahnihna dinhmun an luah, hmahruaitu AC Milan nen an point a inzat; mahse head-to-head en a nih avangin Milan an chungnung rih zawk a ni.

Roma hian a chung bera awm chungin kartawp an hmang a, mahse point an hmuh belh loh avangin palinaah an tlahniam. Inkhel dangah Inter Milan chuan Pisa chu 2-0 a hnehin, pathumnaah an inhlangkai thung.

Inter Milan tan Lautaro Martinez chu mamawh chhanna a la ni reng - Argentina international striker hian goal hnih khungin a team a chakpui. Inter hian an match hnuhnung pahnihah Milan leh Atletico Madrid an hneh lo, tuna an chak ve leh ta hi an tan chanchin lawmawm a ni.