Real chak zo lo - an dinhmun a hniam!

Kar hmasa lama Spanish La Liga hmahruaitu Real Madrid chu hmahruaitu an ni ta lo - kartawp inkhelah an hmelma Barcelona an chak laiin an chak zo ve tlat lo a, table-ah pahnihna an ni.

Barcelona-in Inrinni zanah Alaves an hneh laiin, Real erawh Girona khelmualah an chak zo lo a, 1-1 in an inhnehtawk - hei vang hian table-ah pahnihna an ni a, point khatin Barcelona an phak lo.

Girona tan Azzedine Ounahi chuan goal hmahruai a khung hial a, Real hian Kylian Mbappe penalty hmangin si phurh an sut. Mahse, goal dang an khung thei tawh lo a, point khatah lungawi an zir.

Hetihrual hian Barca hian zanin dar 1:30-ah Atletico Madrid an mikhual zui dawn a, club lian pahnih inhmachhawn tur an nih avangin Real tan hmahruaitu nih zui lehna chance a sang hle.

Rin loh lam

Girona hi relegation zone-a awm an ni a, Real tan chak harsatna hmun turah ngaih a ni lo. Mahse, an elpui Barca leh Atletico Madrid chak thu hre saa inlan Real hian goal khung an harsat tlat.

Mbappe chuan goal hmahruai a khungah inngai mah se, a goal khung hma hian a kuta ball a tawh fuh avangin pawmsak a ni lo a, minute 45-naah Girona lamin Real an hrem zui.

Counter attack aṭanga ball kal chu Ounahi chuan goal chung kil sirah, penalty box pawn hret aṭangin a khung - goal ṭha bik a ni a, Real keeper ṭha mi Thibaut Courtois meuh pawhin tih theih a nei lo.

Goal dang lut loin chawlhlawk hman zui a ni a, Real hian Girona an hmachhawn hmaa an match hnuhnung paliah vawi khat chiah chak an neih avangin fans an hlauthawng.

A tawk lo

Second half-ah Real inkhel a nung sawt a, an beisei angin goal erawh an khung lawk lo. Vinicius Jr-a'n si phurh a sutah inngai mah se, offside vanga pawm a ni lo.

Minute 67-naah erawh Real an vannei ta nge nge. Girona right back Hugo Rincon chuan box chhungah Vini a titlu a, penalty a chawi - a pet turin Mbappe a lo pen chhuak a, si phurh a sut.

Mahse, Real-in goal dang khung an harsat miau a, 1-1 in inkhel a tawp. Mbappe-a'n tun season inelna hrang hrangah match 19 khelin goal 23 a khung ta a, mahse, a team chakpui nan erawh a tawk zo lo.

Real hian an league match hnuhnung pathumah Rayo Vallecano (0-0), Elche (2-2) leh Girona (1-1) an inhnehtawkpui a, Xabi Alonso-a'n a team a siamrem vat a ngai - Nilaini zan dar 11:30-ah Athletic Bilbao an lenchilh zui ang.