Kohli leh Rohit ten India chakpui

Test series-ah South Africa lakah India an mualpho a, ODI match thum khelh tura hmasa berah erawh Men in Blue an chak nghal. Tawnhriat nei ṭha pahnih Virat Kohli leh Rohit Sharma te an rawn kir a, Pathianni zan khan Proteas lakah 17 runs-in hnehna an chang.

JSCA International Stadium Complex, Ranchi-ah ṭhumvawrah South Africa an vannei a, vawm hmasak an thlang. India tan Yashasvi Jaiswal leh Rohit Sharma ten bul an ṭan a, kum 23 mi Jaiswal-a'n 18 runs chauh a siam. Rohit kawppui turin Virat Kohli a rawn lut a, entu mipui tan hmuhnawm an chhawp.

Rohit-a'n half century (57) siamin Kohli-a'n ball 120-ah 135 runs siamin century a siam. Batter ṭha bik Kohli hian four vawi 11 a vua a, six vawi sarih a vaw chhuak bawk. India tan KL Rahul (60) a rawn che ṭha bawk a, over 50-ah 349/8 runs an siam.

India hi chak mai tura ngaih ni a, Proteas top order an vawm hlum hma. Captain Aiden Markram (7), Ryan Rickelton (0) leh Quinton de Kock (0) ten run tam an siam lo.

Mahse, Matthew Breetzke-a'n 72 runs rawn siam a, Proteas tan beiseina a rawn siam. Middle order dang pawh an che ṭha Tony de Zorzi (39), Dewald Brevis (37), Marco Jansen (70) leh Corbin Bosch (67) te an chet ṭhat avangin mikhual team hi chak thei dinhmunah an ding hial.

Over hnih a la awmin Proteas-in 27 runs siam an la mamawh a, chak thei dinhmunah an ding. Mahse, India bowler Kuldeep Singh (68/4), Harsit Rana (65/3) leh Arshdeep Singh (64/2) ten an tihtur an ti a, over 49.2-ah vawm hlum vekin Proteas-in 332 runs an siam a, an target hi 17 runs-in an phak lo.

ODI match hnihna hi December 3, Nilaini chawhnu dar 1:30 hian New Raipur-ah khelh a ni dawn. Series tawpna hi December 6, Inrinni chawhnu dar 1:30 hian Visakhapatnam-ah an khel ang.