City-in champion beiseina an nei thar

Manchester City-in kartawpah Leeds United an hneh hram a, an mamawh ber point thum an hlawh chhuak thung. Champion tuma Citizens elpui Arsenal leh Chelsea ten Pathianni zanah point an hloh ve ve a, Pep Guardiola hote tan champion beiseina a nung thar. Zanin dar 1:00 hian Craven Cottage-ah City-in Fulham an tlawh ang.

Erling Haaland-a'n kartawpah goal khung lo mah se Phil Foden a rawn che ṭha leh tawh a, English midfielder hian goal hnih khungin a rintlak leh tawh hle. Player thar Rayan Cherki a dam leh tawh a, assist a rawn nei leh bawk. Pep Guardiola-a'n team thar 'ṭha bik' la din thei chiah lo mah se Arsenal tan buaina tham an la ni thei thung.

City hian Fulham lakah record an nei ṭha, an inkhelh hnuhnung 18-ah an chak vek. London club-in hnehna an chan hnuhnun ber chu kum 2009 daih a ni tawh a, Haaland pawhin Cottagers lakah chuan league match rukah goal ruk a khung. Chutihrualin kartawpah khan Fulham-in khualmualah Spurs an hneh a, inrintawkna an nei lian khawp ang.