India-in Asian Cup U17 khel dawn

AFC Under-17 Asian Cup 2026 khel turin India chu an inpetkai - Indian rawlthar rual hian Iran chu 2-1 in an hneh a, football thilmak thlentirin football ram ropui zawk Iran an pet chhuak!

Ahmedabad khawpuia inkhelah Iran hian goal an khung hmasa zawk a, minute 19-na lekah Amirreza Valipoor chuan goal hmahruai a khung - India tan beisei a sang lo sawt hle.

Mahse, first half hun pek belhah Dallalmuon Gangte chuan penalty aṭangin si phurh a sut a, minute 52-naah Gunleiba Wangkheirakpam chuan khung belhin, hun tawp thlengin goal dang a lut tawh lo.

Asian Cup U17 qualifier-ah hian team 38 inlanin, group pasarihah ṭhen an ni a, group tina hmahruaitu chu Asian Cup khel tur hian an tling.

India hi group D-ah awmin, Palestine (1-1) leh Chinese Taipei (3-1) lakah point li hlawh chhuakin, Lebanon (2-0) lakah an tlawm a, hei vang hian Iran lakah chak ngei ngei an mamawh - Iran tan draw a tawk thung.

A tawpah chuan beisei loh zawk India-in Saudi Arabia-a khelh tur Under-17 Asian Cup an khel dawn a, Khawzawl naupang Lawmsangzuala (Mapuia) chu Mizoram player awmchhun a ni.

SYS Academy, Kolasib aṭanga inzir chhuak Mapuia hian SAFF U17 Championship 2025-ah India tan nomawi a lo chawi tawh bawk a, coach Bibiano Fernandes hian kum 2018, 2020 leh 2023 khan Asian Cup U17-ah India a lo tlinpui tawh bawk.