Alcaraz tan harsatna a awm lo

Wimbledon champion lai Carlos Alcaraz tan third round lut turin harsatna a awm lo - Spanish star hian Nilaini zan khan Oliver Tarvet chu straight set hmangin a hneh a, atan hna hautak hmachhawn tur a awm rih lo.

Alcaraz hi a zawna champion thei a ni, a khingpui Tarvet erawh world number 733 daih a ni thung. Darkar hnih leh minute 17 an inkhelh hnuah seeded pahnihna Alcaraz hian 6-1, 6-4 6-4 in hnehna a chang.

A tir aṭanga a tawp thlengin Alcaraz hian inkhel a thunun thei. Kum 21 mi Tarvet hi University of San Diego zirlai a ni a, tennis khelh hi a hnapui ber a ni hran lo, atan chuan Centre Court-a Alcaraz hmachhawn kha inchhuanna tham a tling dawn.

Grand Slam vawi nga champion tawh Alcaraz chuan, "Oliver khan fak a phu - Grand Slam a khelh vawi khatna chauh a ni a, a vawi khat nan Centre Court-ah a inkhel bawk, chutiang chung chuan ṭha takin a khel chhuak.

"Inelna lianah hi chuan chetsual thut theih a ni tih ka hrechiang a, chuvangin a tir aṭang khan a ṭha thei ang berin ka bei nghal. Ka duh leh tum anga ka khelh theih avangin ka lawm," tiin a khelh danah a lungawi hle.

French Open champion hlim Alcaraz hian duhthusama ṭha chuan a la khel bik lo, chutihrualin a match hmasa nena khaikhin chu service leh forehand ten hma an saw hle, a zawna vawi thum champion a tumna kawng a ding chho zel.