Norris ṭawng fimkhur

Formual 1 driver championship-a pahnihna ni lai, champion beisei awm berte zinga mi Lando Norris chu a ṭang fimkhur hle a, kuminah a hlawhtling ta lo a nih pawhin atan buaina tur a awm lo tih a sawi.

Pathianni zan dar 7:30 hian Silverstone tlankawngah British Grand Prix an tlan leh dawn, tualchhung tlangval Norris hian mipui ṭan a hlawh dawn tih a chiang. Amah ang bawka McLaren driver Oscar Piastri nen na takin an inum leh pawh a rinawm.

Kum 25 mi Norris chuan, "Champion ka tum lo tiin sawi ila chu thu dik lo a ni ang, chutihrualin nomawi chawi ngei ngei hi ka tum ber a ni lem lo, car intlansiak hi nuam ka tih em avanga tel ka ni zawk.

"Champion thei ila chu duhthusam a ni ngei mai, amaherawhchu chumi tih hlawhtlin duh lutuk avanga ngaihtuahna fim lo neih erawh ka duh lo, season kal laiah hian ka hun a la thleng lo a nih pawhin nakkum pawh ka nghak mai ang," tiin a sawi.

Norris leh a teammate Oscar Piastri te hian tun hnaiah boruak an nei zauh zauh; Canadian Grand Prix an tlan ṭum phei chuan an inbakkaih hial a, chumi hnua Austrian GP-ah erawh pakhatna leh pahnihna an ni leh thei tawh thung.