USA leh Mexico ten final an lut

Concacaf Gold Cup-ah Mauricio Pochettino kaihhruai United States-in Guatemala hnehin final an lut a, inelna record nei ṭha ber Mexico nen July 7, Thawhṭanni zing dar 4:30 hian nomawi an inchuh ang. Mexico hian semifinal-ah Honduras 1-0 in an hneh thung.

Gold Cup inelnaah Mexico leh United States an chungnung a, an in champion chhawk a ni ber. Champion lai Mexico hi vawi kua champion tawhin USA hi vawi sarih an champion tawh a, Argentine manager Poch-a hoin Mexico hneh ngei an tum dawn.

I la hriat loh Luna

United States manager Pochettino-a'n football khawvelah hming chher viau tawh mah se Guatemala laka chakpuitu Diego Luna erawh khawvel huapin a la lar pha lo.

Kum 21 mi Luna hian quarterfinal-a Costa Rica an hneh ṭumin goal hmahruai a khung a, semifinal-ah a langsar lehzual. Minute lina lekah box pawn aṭanga Luca de la Torre ball pet chu Guatemala keeper Kenderson Navarro-a'n ti perin Luna hian a per hi goal-ah a chantir.

Energizer Park, St. Louis-a entu 22,423 tan US no. 10 Luna-a'n a thiam thil a rawn lantir leh a, minute 15-naah box pawnah ball rawn chawk kual velin kawh zetin a pet goal zui a, a che vel thlirin no. 10 hak pawh a inhmeh hle.

Luna hian January 2024 aṭang khan ram tan a khel ṭan chauh a, tunah hian ram tan match 11 khel tawhin goal thum a khung tawh. MLS club Real Salt Lake tan a khel mek a, final-a a chet ṭhat zui chuan European club pawh an en zui ngei ang.

Semifinal-ah hian US-in goal hnih khung hma mah se goal dang an khung thei tawh lo a, Guatemala lamin an nawr na ve hle. First half-ah Rubio Mendez goal khung chu offside vangin pawm a ni lo a, second half-ah pawh na taka nawrin minute 80-naah Olger Escobar-a'n siphurh sut ṭhenin goal dang erawh a luh belh tawh lo. United States 2-1 in an chak hram.

Mexico tan Jimenez

Mexico-in an ram coach lar Javier Aguirre hnuaiah an khel a, kum 66 mi Aguirre hian La Liga club Atletico Madrid, Zaragoza, Espanyol, Leganes leh Mallorca bakah Japan leh Egypt thlengin a enkawl tawh.

Levi's Stadium, Santa Clara-ah pawh entu 70,975 an pung khawm a, Honduras lakah Mexico an khel ṭha zawk hrim hrim. First half-ah goal a luh loh hnuin minute 50-naah Raul Jimenez a rawn inlar a, Premier League-ah pawh striker langsar ni pha 'finishing' a ṭha hle.

Jimenez goal khung tur siamsaktu Gilberto Mora hi chhinchiah a ngai, kum 16 mi lek niin ram tana a vawi hnih inlanna chauh a ni. Amah hi Mexican footballer Gilberto Mora (an hming a inang chiah) fapa a ni a, a pa erawh ram tan a khel pha lo. Kum 16 mi Mora erawh a dam ṭha a nih chuan ram tan a la khel dawn chauh.

Mexico-in goal an khung hnuah pawh an nawr na a, an vanduaia goal dang an khung lo mai a ni. Captain Edson Álvarez goal khung pawh VAR hmanga ennawn hnuah offside vangin pawm a ni lo a, inkhel an thunun miau avangin harsatna nei loin 1-0 in an chak.