Zanin aṭangin Club World Cup quarterfinal

FIFA Club World Cup quarterfinal chu zanin aṭangin khelh ṭan a ni dawn a, zanin dar 12:30 hian Florida-ah Fluminense leh Al Hilal te an inkhel dawn. Brazilian club leh Asian club te hi European club lian pahnih Inter Milan leh Manchester City te ngam loh an ni.

July 5, Inrinni zing dar 6:30-ah Palmeiras leh Chelsea te an inkhel dawn a, Premier League club hian Brazilian club an hmachhawn hunah an player thar Brazilian forward Joao Pedro an chhawr thei ang.

European club ngamtu

Last 16 khelh hma khan quarterfinal-ah Fluminense leh Al Hilal te hi an inhmachhawn a rinawm lo a, Inter Milan leh Manchester City lakah hnehna an chan theih a rinawm loh. Mahse, football-ah chuan thil chiang sa a awm lo a, European club ṭha pahnih an pet thlak miau avangin an khel tur hian ngaihven a hlawh sawt ang.

Fluminense hian Club World Cup hnuhnung bera khan final an lut thei a, Renato Gaúcho enkawl team-ah hian tun inelnaah tlawm an nei lo. Quarterfinal lut zinga mi Borussia Dortmund pawh an hmachhawn tawh a, goal awm loin an inhnethawk.

Match pawimawhah Brazilian club hian goal an chhuah lo a, Inter leh Dortmund laka goal an chhuah loh bakah group match hnuhnung bera Mamelodi Sundowns nen an inhmachhawn ṭumin goal an chhuah lo. An tlarhnung phui ṭha hi an hmachhawn tur a ni a, chutihrualin an tlarhma pawh a nep lo - Inter lakah goal hnih an khung thei tlat.

Al Hilal hi Asian club ni mah se an player pawimawh chin chu Europe-a tawnhriat nei ṭha tak vek an ni a, 2022 CWC finalist hi Brazilian club lakah an buk a rit zawk hial ang. Italian manager Simone Inzaghi-a'n a enkawl a, Man City kha vanneih vang ngawta hneh an ni lo - player an nei ṭha tlat.

Saudi club hian Moroccan keeper ṭha Yassine Bounou an kawl a, tlarhnungah Atletico defender hlui Renan Lodi, Napoli defender hlui Kalidou Koulibaly leh Man City defender hlui João Cancelo te an awm.

Midfield-ah Portuguese midfielder Rúben Neves an nei a, Wolves midfielder hlui hian Premier League aiin Saudi Pro League-ah a tlan tam thu a sawi tlat. Lazio midfielder Sergej Milinkovic-Savic bakah Brazilian attacker Marcos Leonardo leh Malcom te an nei bawk. Asian club an nih vanga dah hniam an rem lo, Man City hnehtu an ni.

Chelsea lam hi

Chelsea tan final kalkawng a inhawng zau a, Club World Cup-a nomawi an chawi a nih ngat chuan Conference League nomawi an chawi tawh bawk avangin Enzo Maresca tan chuan hlawhtlinna ropui tak a ni thei ang. Blues hi Palmeiras lakah team ṭha zawk an ni chiang a, mah se US khawlumah erawh chesual thei an ni thung.

Maresca tana harsatna belhchhah turin midfielder pawmawh Moises Caicedo a chhawr thei dawn lo a, Romeo Lavia leh Enzo Fernandes te tan mawhphurhna a tam sawt dawn. Tun nipuia an lakluh Liam Delap chu rinrawla hman atan chuan a la duap deuh a, striker thar Joao Pedro chu thlawptu ṭha tak a ni thei dawn.

Cole Palmer leh Pedro Neto te theihna a sang a, Palmeiras lakah an lantir a ṭul dawn. Brazilian club hian quarterfinal lut turin Botafogo chu extra time-ah 1-0 in an hneh hram a, chutihrualin FC Porto chelh theitu team hi vanduai theihna team an ni thung.