Kane leh Bayern tan nomawi a hnai ta

Zanin dar 7:00 hian Bayern Munich chuan Mainz an mikhual dawn a, a hun ngaiah champion lai Bayer Leverkusen chuan Augsburg an lo mikhual ve thung ang.

Bayern Munich hian parukna Mainz hi an hneh a, inkhel dangah Leverkusen hi an chak zo lo a nih chuan Harry Kane awmna Bavarians hi Bundesliga champion an ni thei tawh dawn a ni.

Vincent Kompany leh a naute tan Leverkusen lak aṭanga Bundesliga title lak let hi thil châkawm tak a ni dawn, a bik takin nomawi chawi duh vanga German club lian zawmtu Kane tan a lawmawm zual ang.

England captain Kane hian Tottenham tan sulhnu ṭha tak a hnutchhiah a, mahse a champion pui theih loh avangin Bayern hi a zawm. Bavarians tan hian mak tak maiin a season hmasa berah nomawi a chawi miah lo.

Tunah erawh Kane hi champion thei dinhmunah a ding ta. English striker Kane chuan, "Mi tam tak hian engmah mah a champion ve lo tiin min sawisel ṭhin, chung mite ngawihtir theihna remchang kan nei thei a nih chuan duhthusam a ni ang," tiin a sawi.