Vawiin tlai dar 5-ah Merseyside Derby Everton vs Liverpool

International break zawhah Premier League inkhelh ṭha bik chhawpsak nghal kan ni dawn a, vawiin tlai dar 5:00-ah Merseyside Derby thlir tur a awm dawn. Phunna tur zawng hrim hrim tan inkhelh hun a hma hret hi sawisel theih awmchhun a tih theih a ni a, a bak zawng chu duhthusam a ni.

Everton-in Liverpool an elphak loh ṭhin avangin Merseyside Derby-in hlut a hlawh tawk ṭhin lo a, tun ṭumah erawh Toffees hi league match vawi liah la chak vekin hmahruaitu an ni mek. 

Carlo Ancelotti hote hi an chet ṭhat vanglai a ni a, an mual Goodison Park-ah an khel dawn. Hetihlai hian Liverpool erawh Aston Villa laka 7-2 zeta mualpho hlim ni mah se Thiago Alcantara, Sadio Mane leh Joel Matip ten training an zawm leh tawh a, Premier League champion lai an ni tih hriat a ṭha bawk.

Fiahna Pawimawh

Premier League champion sawina hun atan a la hma hret, chutihrualin inkhel result hian nghawng erawh a nei lian dawn. Liverpool hi Villa laka an mualpho nachungin champion rinkai an la ni reng a, Everton erawh inelna hrang hrang vawi sarih an chak zawn tawh nachungin champion thei tur zingah an dah lo.

Toffees hian fiahna hmasa hi an paltlang a nih chuan club pahnih chunga ngaihdan awm sa hi ngaihtuah ṭhat a ṭul ang. Season liam ta thlirlet ila, tun ang hunah chuan Reds hi match riat chhung an chak zawn tawh a, ni hnih hnuah Manchester United nen 1-1 in an inhnehtawk dawn.

Jurgen Klopp hote hi hneh loh nei loin an kal chho char char a, an champion ngei tawh dawna a lan hnuah kumin February 29 khan Watford lakah mak takin an tlawm chauh. Everton nena an inkhel thlur bik chuan nikum December 4 khan Liverpool-in Toffees hi 5-2 in an sawp a, tun hma ang thoin club inthlau tak an la ni reng.

Amaherawhchu Everton hian Marco Silva an ban a, khawvel coach tawnhriat ngah ber zinga mi Carlo Ancelotti an lalut. Italian manager awm hnuah kumin June 21 khan Goodison Park-ah an inkhel leh a, goal awm loin an inhnehtawk.

Elpui tlak Carlo

Liverpool manager Jurgen Klopp-a'n a ngaihdan thiam takin a chhep chhuak ṭhin. Toffees-in Carlo Ancelotti an lak dawn a, Klopp-a'n a rilru put hmang a sawi ṭha leh hian zanin inkhel en a châkawm phah hle.

Klopp chuan, "Carlo Ancelloti chungchanga ka ngaihdan hi zep ṭul ka ti lo. Ka zah em em a, pa ṭha tak a ni. Everon-in an lakluh dawn khan 'elpui tham an awm belh dawn' tih chu ka ngaihtuahnaa lo awm a ni. Nipui bazar an hmang ṭha a, an mamawh tak an lakluh avangin Carlo hote hi team ṭha tak an ni," tiin a khingpui tur Carlo Ancelotti a fak.

Reds boss sawi ang hian Everton sawi nep theih an ni ta lo. Football-a pawimawh ber goal khungtu an kawl a, Dominic Calvert-Lewin-a'n tun season-ah goal kua a khung der tawh! English striker kum 23 mi thlawp tur hian South American player James Rodrigues leh Richarlison an kawl a, talent an nei ṭha ve ve.

Team ṭha Toffees

2014 World Cup star James hi a theihna thlirin Everton-a khel tur niin a lang lo a, amaherawhchu Ancelotti-a'n a sawm lut miau si. Colombian midfielder hian English club tan match nga a khelh tawhah goal leh assist vawi thum ve ve a nei tawh a, Real Madrid-ah beisei pha lo mah se a thiamzia hai rual a ni lo. 

Richarlison erawh a chetfuh ni chuan Brazil rinrawl ni thei tur khawpa thiam a ni a, chutihrualin chet chhiat ni a neih tho avangin fak chiam a har. Amaherawhchu Toffees hian Iceland thiampuipa Gylfi Sigurdsson an kawl a, sawi hmaih theih loh erawh midang tana khel ṭhin Allan hi a ni. 

Kum 29 mi Allan hi pound maktaduai 24 man a ni a, James ten an thiamna an hmanchhuah theih nan Brazilian midfielder hi a pawimawh hle. Toffees tlarhnung lam erawh a phui bik lo, keeper Jordan Pickford-a'n tihsual a neih ve reng bawk. 

Italian manager hian tlarhnung thuam chak nan Roma aṭangin keeper Robin Olsen chu loan hmangin a lalut a, Norwich City aṭangin centre back Ben Godfrey chu pound maktaduai 20 zetin a lalut bawk.

Champion hliam tuar

Aston Villa-in Liverpool an hliam a, Merseyside derby pawh ni lo se Jurgen Klopp-a hote hi tum châkawm loh lai tak a ni. Reds-in Villa an hneh ṭumin captain Jordan Henderson bench-ah an dah a, English midfielder hi a dam ṭha tawh a, bul a ṭan thei tawh ang. 

Liverpool ṭantute lawmna tur erawh an trio Sadio Mane, Roberto Firminio leh Mohamed Salah ten bul an ṭan leh thei tawh dawn. Mamawh huna chhawr theih turin Portugal-in Sweden an hneh ṭuma goal hnih leh assist vawi khat nei Diogo Jota an kawl a, Thiago Alcantara a dam tawh bawk avangin tlarhma lam chu a ngaihṭhat thlak hle.

Tlarhnung lamah erawh keeper Alisson Becker a awm lo a, Adrian lakah rinna nghah ngam a harsa. Chutihrualin hei tak hi Merseyside Derby ti ngaihnawmtu tur a ni a, team pahnih keeper-in tihsual an chin ve ve avang te leh tlarhma an neih ṭhat avang tein goal hmuh ngei a beiseiawm hle. 



Share this Post

Login to comment
No Comments