Aston Villa-in director thar nei

Premier League tawp nia English top flight league an khelh chhunzawm tur tichiangtu Aston Villa chuan khelmual chhung chauh niloin a pawn lam thlenga inthuam ṭhat an tum a, FC Copenhagen technical director Johan Lange chu sporting director atan an lalut. 

Kum 40 mi Lange hian Jesus Garcia Pitarch hmun ruak a luah dawn a, Jesus hian Premier League-ah an inhamtang tih a chian hnu Thawhṭanni khan a hna hi a bansan a ni. 

Villa hian nipui transfer lai khan player thar lakluh nan pound maktaduai 100 chuang an seng a, mahse an player lakluh ten beisei an phak loh avangin January-ah goalkeeper Pepe Reina, midfielder Danny Drinkwater leh striker Mbwana Samatta an lakluh a ngaih phah. 

Premier League club chuan hei hi hre rengin season tawp rual khan an transfer policy bihchianna an nei a, tun nipuia an bazar dan turah hian Lange hian thui takin thuneihna a neih a rinawm.

Lange hi English football-ah a mikhual hran lo - Norwegian coach Stale Solbakken-a'n 2012-13 season-a Wolverhampton Wanderers-a enkawl khan assistant coach a lo ni tawh. 

Villa hian Pathianni zan khan Premier League-a an match hnuhnung berah West Ham chu 1-1 in an inhnehtawkpui a, season tawp lama an match hnuhnung palia tlawm an neih loh avangin an him hram a ni.



Share this Post

Login to comment
No Comments