Liverpool-in New Balance nen nomawi chawi dawn

Liverpool leh season thara sponsor-tu Nike te an inbe rem a, Reds-in New Balance kawr hain season an khar thei dawn. Jurgen Klopp-a hote hian league nomawi an chawi ngei dawna a lan avangin New Balance kawr hain a vawi khat nan Premier League nomawi an chawi dawn a tih theih.

Eng nge buaina?

Covid-19 vangin football season tawp hun tura ruahmanah a tawp thei ta lo. Coronavirus hian khelmual chhungah chauh ni loin khelmual pawn lamah pawh nghawng a nei lian hle. Liverpool leh US company lian New Balance inremna chu May 31, 2020-a tawp tur a ni a, June 1 aṭangin season thar a inṭan dawn chiah.

Reds hian kumin January 7 khan thuchhuah siamin US company tho Nike nen inremna an siam thu an puang a, June 1, 2020 aṭangin Nike nen an thawhdun tur hi an ziak lang tel bawk. Nike hian Liverpool inkhelhna leh training-na thawmhnaw bakah an zinnaa an hak kawr an siamsak ang.

Amaherawhchu Covid-19 vangin June 1-ah inelna khelh zawh a ni lo a, a hun thlir chuan New Balance nena kum nga chhung an inremna zo tawh dawn mah se inelna ber zawh a la ni lo. Hemi a nih avang hian Nike leh Liverpool an indawr a, Reds-in tun season tawp thleng New Balance kut chhuak an ha thei dawn.

Reds, NB leh Nike

Nike hian kum khatah Liverpool hnenah pound maktaduai 70 an pe dawn a, amaherawhchu June 1, 2020 aṭanga an hak ṭan dawn loh avangin US company hnenah hian zângnadawmna pek a ni dawn. English club-in an pek tur zat hi puanzar a ni lo.

Liverpool hian New Balance nena an contract tih hlawhtlin hi an mawhphurhnaah an ngai a, March thla 

aṭang khan indawrna hi kal ṭan tawhin a hlawhtlin theih tak avangin an lawm hle. 

Engtin zel?

Liverpool leh Nike inremna hi Premier League club dang pawhin an ngaihven ang. Newcastle leh Watford ten Puma leh Adidas nena an contract neih chu tun season tawp hmain a tawp dawn.

Premier League club pangain kawr a chhut kai tur sponsor thar an nei dawn a, club dang pangain kawr ban sira chhut kai tur sponsor an zawng mek. Nilaini khan Everton chuan Hummel nen inremna an neih thu an puang a, Hummel hian Toffees hi kum khatah pound maktaduai 10 an pe dawn.

Everton hi an hmelma Liverpool nena khaikhin a ralah chuan an inremna hi a inthlau hle. Reds hian New Balance aṭang khan kum khatah pound maktaduai 40 an lalut a, Nike nen kum khatah pound maktaduai 70 an lalut dawn. Hei hian Liverpool leh Everton inkar hlatzia a sawifiah.

Champion thar

Premier League-ah hian club paruk Manchester United (13), Chelsea (5), Manchester City (4), Arsenal (3), Blackburn Rovers (1) leh Leicester City (1) te an champion tawh a, English club ropui Liverpool an la champion ve lo.

Reds hi khelmualah chelh thei an awm lo a, Premier League club zingah an nomawi chawi tur dan thei an awm tawh lo a ni ber. Amaherawhchu Covid-19 vangin khawvel a buai a, Premier League pawh a bang lo. Khawvela football league ngaihven hlawh ber hi a ṭan leh theih an dan tur an zawng a, an hlawhtling a nih chuan Liverpool-in dan ang thlapin champion an nem nghet ang.

Chutihrualin Covid-19 vangin inelna zo thei ta lo pawh ni se Paris St-Germain, Celtic leh Club Brugge te hnung zuiin Liverpoool hi champion-a an puan ngei a rinawm hle.



Share this Post

Login to comment
No Comments