Covid 19 do turin Messi, Ronaldo & Pep thawk chhuak

Khawvel chawk buaitu hri leng coronavirus do nan Lionel Messi leh Barcelona-a a pu hlui Pep Guardiola te an pen chhuak a, Covid-19 darh zel tur do nan euro maktaduai khat ve ve an thawh. 

Hetihlai hian Juventus forward Cristiano Ronaldo leh a agent Jorge Mendes-te chuan euro maktaduai khat man hu hmanrua an thawh bawk a, coronavirus hri kai te enkawlna Lisbon leh Porto-a damdawi in te thuam chak nan hmanruate hi pek a ni. 

Messi hian Barcelona khawpuia damdawi in 'Hospital Clinic' leh Argentine-a damdawi in pakhatah a sum thawh hi a pe a, damdawi in pahnih hian sum hi an insem ang. 

Manchester City manager Pep Guardiola hian Medical College of Barcelona leh Angel Soler Daniel Foundation-ah sum hi a thawh thung a, Covid-19 do nan hman a ni dawn. 

Messi sum thawh

Barca thiampuipa Messi hian a sum thawh chungchang hi he thu buatsaih thleng hi chuan a puang zar lem lo a, mahse Barcelona khawpuia a sum thawhna Hospital Clinic hian social media lamah Messi hnen aṭanga sum an dawn thu hi an puangzar a ni. 

Messi hian World Health Organization leh FIFA hmalaknain coronavirus chungchangah nasa takin hma a lo la tawh a, tih tur leh tih loh turte mipui hnena hrilhin a hun a hmang. 

Ronaldo ve thung

Khawthlang media report ṭhenkhatah chuan Ronaldo leh a agent Jorge Mendes-te bungraw thawh hi pound maktaduai khat man hu nia sawi a ni a, Lisbon leh Porto-a damdawi in ten an dawng. 

Lisbon khawpuia dawngtu hi Santa Maria hospital an ni a, Porto khawpuiah Santo Antonio-in an dawng ve bawk. Damdawi in pahnih hian he thu hi an puang zar a, Mendes hian kar hmasa khan Covid-19 kai te enkawlna tur bungrua a lo sem daih tawh. 

Hei le Pep

Pep hian sum a thawh tur thu hi hmanni lawk khan a tichiang a, a ukil te nen a hman dan tur ṭha ber an ngaihtuah hnuah Medical College of Barcelona leh Angel Soler Daniel Foundation puih nana hmang turin thutlukna an siam ta a ni. 

Coronavirus hri lengin a tihbuai ram zingah Spain chu a tuar na ber pawl an ni a, hri kai ringawt hi 40,000 an tling tawh a, he thu buatsaih a nih thleng hian mi 2,696-in an thihpui. 



Share this Post

Login to comment
No Comments