Olympic sawn hian infiammi a nghawng dawn - IOA Secretary General

Indian Olympic Association secretary general Rajeev Mehta chuan, kumin nipui laia neih tur Tokyo Olympic neih hun an sawn chuan infiammiteah nghawng na tak a neih a rin thu a sawi.

Tokyo Olympic 2020 hi Covid-19 vangin July thla tawpa neih tur chu a hun sawn a ni a, nakkum nipui zawh hmain infiamna khawmpui lian hi Japan khawpuiah tho hian neih tur a ni ang.

IOA secretary general Mehta chuan, "Kum khata sawn hlat a ni hian infiammi tam tak nun leh inbuatsaihna a ti thlawn. Mi ṭhenkhat tan chuan kum khat leka upat belh pawh hi a pawi thei ṭhin. Churih rualin kan ṭhat tlanna tur zawk a ni tih hriat a ngai.

"International Olympic Committee (IOC) thutlukna hi keini chuan kan thlawp. Infiammite himna leh hriselna hi kan ngaih pawimawh leh dah hmasak a ni. India ram pum inkharkhip hi a zawh hunah association hruaitu hrang hrang ka be rawn ang a, chumi hnuah chuan kan kal zel dan tur a hriat theih ang," tiin a sawi.

Infiamna peng ṭhenkhatah chuan Olympic khel tur hi a chiang tawh, chutih rualin inlan tur tam tak chu a la chiang lo. Qualifier ṭhenkhat chu khelh loh a ni hial, tunah erawh inelna neih hun an sawn tak avangin ngaihtuahna thar an neih leh ngei pawh a rinawm.

Olympic khel tura tling tawh Mary Kom chuan inelna neih hun an sawn chu a thlawp thu a lo sawi ve bawk. Manipuri boxer chuan, "Tunlai dinhmun ka thlir a, tun hnaia World Health Organisation thu chhuak ka hmu bawk.

"Ka phak ang tawka ka ngaihtuah hnuin Olympic neih hun tur an sawn hi IOC lamin an tih tur dik tak an tiah ka ngai," a ti. Mary Kom hi kum 37 mi a ni tawh a, kumin ai chuan nakkumah chuan a tha a zuai deuh ngeiin a rinawm. Mahse world champion vawi nga ni tawh hian hrilselna a dah pawimawh thiam hle.

Indian infiammi zingah Tokyo Olympic atan hian infiammi 74 chu inelna peng hrang 15 atan an tling chiang tawh a, Rio Olympic-a infiammi 117 a tirh chhuah ai chuan an tam ngei tura ngaih a ni.

Mahse, IOC lamin eng tiangin nge qualifier an kaltlangpui dawn tih a la chiang lo. Sports Association ṭhenkhat chuan an ranking ngai an kaltlang pui tur thu sawi mah se, anni pawhin player dinhmun ngaihtuahin qualifier tournament dang an buatsaih a rinawm.



Share this Post

Login to comment
No Comments