Europe-a football la khelhna hmun Belarus

Europe khawlmualpuiah football thiam ram an tam a, tunah erawh Covid-19 vangin football lam an ngaihtuah tawh lo. Hetihlai hian Belarus-ah erawh Belarusian Premier League khelh chhunzawm a ni a, Arsenal leh Barcelona star hlui Alexander Hleb chuan, "Coronavirus lam an ngaihtuah lo," tiin a sawi.

March 19 khan khan Belarusian Premier League chu Belarus khawpui Minsk-ah khelh ṭan a ni a, Energetyk-BGU leh BATE Borisov te an inhmachhawn. Thilmak a thleng nghal a, team tenau Energetyk hian Belarus club lar ber zinga BATE Borisov chu 3-1 in an sawp. 

Round hmasa ber khelh zawh a ni tawh a, tun kar hian round hnihna khelh leh tur niin team 16 telna inelna hi ruahman dan chuan kumin December 5-a khelh zawh tur a ni. Belarusian Premier League hi tun kar pawh hian khelh a la ni dawn a, kar liam ta Ningania Turkish Super Lig an chawlh takah chuan Europe-a football inelna lian tham kalpui awmchhun an ni.

Kum 38 mi Alexander Hleb chuan, "Khawvelin Belarusian league chauh en tur an nei tawh a, chuvangin an television hmaah ṭhuin kan rama football khel hi en nei rawh se," tiin a sawi.

Hleb chuan sawi chhunzawmin, "NHL season an tihtawp khan hockey player tam tak chu Russia-ah inkhel turin a kal. Chutiang deuh chuan Lionel Messi leh Cristiano Ronaldo te pawh kan ram league-ah hian rawn kal se rawn inkhel teh se," tiin footballer larte pawh ina tawm ringawt loin inkhelhna tur a awm thu a sawi.

Belarus-ah hian Covid-19 a lut lo a ni bik lo a, tunah hian natna vei 81 an awm tawh. Kar liam ta kha Belarus president Alexander Lukashenko chuan ‘tractor therapy’ hmanga virus hneh theih a nih thu a sawi.

Lukashenko hi kum 1994 aṭang khan president a ni tawh a, Europe-a dictator hnuhnung ber ti hialin an chhal. Belarus president chuan, "Mipuite hi tractor nen hna an thawk ṭhin a, virus lam an ngaihtuah lo. Tractor hian mipuite damna a pe a, buh hmunin damna a pe bawk ang," tiin ngaihdan mawl tak a nei.

Hleb chuan an ramin football a kalpui chu ṭha a ti lo. Arsenal player hlui chuan, "Coronavirus vangin Champions League leh Europa League khar a ni a, hei hi a ṭha ka ti. UEFA-in an tihtur dik tak an ti. Belarus-ah erawh mipuiin an ngaihtuah lo a, a mak hle. Kar hnih khat hnuah erawh an chawlh ka ring. Kan President hian virus hnathawh hi a hrechiang phawt duh a ni mahna. Ka chhungte chu inah ka tawmim tir vek a, pawna ka chhuah erawh chuan an la zi nuai nuai thung," tiin a sawi.

Belarus-ah hian Covid-19 vei 81 an awm tawh a, thi an la awm lo. Tun dinhmunah khawvel tibuaitu natna ṭihbaiawm Covid-19 in Belarus a la tibuai lo a, he thu ziah lai thleng hi chuan an rama football inelna sang ber chawlhsan an la tum lo.



Share this Post

Login to comment
No Comments