Awmze neia sum hmang thiam German club Borussia Dortmund

Erling Haaland-a'n Manchester United leh Juventus hnawlin Borussia Dortmund a thlang a, Norwegian forward hian Europe club langsar zawk aia German club a thlan zawkna chhan ṭha tak a awm. Dortmund hian 'superstar' lei lo a, an chherchhuah zawk vang a ni.

Hun thim chu

Borussia Dortmund hi kum 2003 khan an club sum dinhmun a tlakchhiat avangin tawp thei dinhmunah a ding a, an hmelma Bayern Munich-in an chhan chhuak.

Bavarians president hlui Uli Hoeness chuan, "Dortmund sum dinhmun a ṭha lo tih kan hria a, an player hlawh an pe thei lo tih kan hriat khan ṭanpui ṭha kan ti," tiin an elpui an ṭanpui thu a sawi.

Dortmund hi kum 1997 khan European Cup-ah an champion. Sum lama an tlakchhiat pawh hian player langsar Jens Lehmann, Sebastian Kehl, Thomas Rosicky, Torsten Frings leh Jan Koller te an kawl a, 2001-02 Bundesliga champion an nih bawk avangin Bayern elpui turin an ṭha tawk. Heti chung hian Bavarians hian an hmelma hi mamawh hunah ṭanpui an hreh lo.

Bayern hian Dortmund hi pung awm loin pound maktaduai hnih an puktir a, June 2005-a rulh zawh tur a ni thung. Dortmund hian thla hnih chhungin pound maktaduai 1.5 an pe nghal a, a hnu lamah an rul zo.

Dortmund chief financial officer Thomas Tress chuan, "Kan leiba neih kha pound maktaduai 200 daih a ni a, pound maktaduai 2 chuan kan harsatna su kiang lo mah se nasa takin min pui. An hnathawh hi a ropui a ni," tiin Bayern hnathawh a fak.

Klopp leh Dortmund

Borussia Dortmund-in pangana nih phak an harsat chho a, a sang pangaa awm pawh an harsat. Dortmund an vannei a, German manager theihna nei sang bik Jurgen Klopp an chang hlauh. Klopp hi Bayern Munich-in an duh nachungin Dortmund a thlang a, 2011 leh 2012-ah Bundesliga-ah an champion.

UEFA Champions League-ah pawh kum 2013 khan final an thleng a, Bayern elpui ber an ni leh ta bawk. Dortmund hian an sum dinhmun a chhiat aṭanga kum kuanaah nomawi an chawi thei a, Klopp-a'n fak a phu. Chutihrualin club kalphung chu a pawimawh ber a ni a, sum dinhmun chhiat hnuah an fimkhur tawh. German club hi awmze neia sum hmang thiam an ni ta.

Kalphung dik chu

Borussia Dortmund head of youth Lars Ricken chuan, "Dortmund hian tihpalh thil thu emaw vanneih vangin tun dinhmun hi kan thleng lo. Tum mumal tak a awm a, kan tum chu superstar lei loa chherchhuah zawk a ni," tiin a sawi a, a thusawi ṭan chhanna tur ṭha tak a nei bawk.

Klopp-a hnuaia champion team-ah Mario Gotze leh Mats Hummels te an awm a, heng player pahnih hi Bayern-in pound maktaduai 60-in an lalut. 1997 Champions League final-a Dortmund champion-na goal khungtu Ricken chuan, "Ousmane Dembele leh Pierre-Emerick Aubameyang te pawh kan lakluhin player ṭha bik an ni lo a, superstar-ah kan chhuah zawk a ni," tiin a sawi.

Arsenal-in Auba hi pound maktaduai 56-in an lalut a, Barcelona-in Dembele an lakluhna pawh pound maktaduai 135.5 daih a ni a, Dortmund-in sum an pei pung ṭha hle. Manchester City aṭangin first team-ah pawh tel pha lo Jadon Sancho chu kum 2017 khan pound maktaduai 10-in an lalut a, tun dinhmunah chuan pound maktaduai 100 a chuang hial tawh ang.

Dortmund hian kum 19 mi Haaland an leina hi pound maktaduai 17.1 chauh a ni a, Norwegian striker hian manto zawkin Europe club lian zawk a zawm thei ngei dawn. German club hian nikum nipui khan kum 16 mi Giovanni Reyna chu a thlawnin an lalut a, January thla khan kum 17 mi Reyna chu Dortmund tan a inlan der tawh.

Chet ran a pawimawh

Dortmund hian player lak duh dan an nei a, an zep hran lo. Ricken chuan, "Thiamna hrim hrim a pawimawh em em a, che rang leh an thil tih tur rang taka tithei kan duh. First team-a kan player-te pawh an che rang a, a awihawm lo hial zawk," tiin a sawi.

Player naran an duh lo tih sawiin Ricken chuan, "Thla engemaw zat liam ta khan ram dang aṭangin kan under 17 tan player pakhatin a rawn khel a. A ran tawk loh avangin kan lalut lo. Rilru put hmang a pawimawh bawk. School, football leh national team nen vek chuan kar khatah darkar 70-80 te an hman a ṭul a, rilru huaisen a ṭul hle. Kan team-a lo tel a, tlem te ṭhat belh ringawt kan duh lo. Keini chuan mi bik kan duh," tiin a sawi.

Hriatthiamna nen

Borussia Dortmund head of youth Ricken chuan, "School bakah an nitin nunah harsatna an tawk a nih chuan sut kian kan duh. Hei vang hian coach hi training pe thiam ringawt thlang loin nun phung zau zawka thlir thiam kan duh," tiin a sawi.

Dortmund hian chawhrualin entu 80,000 an nei a, Europe-a entu nei ṭha ber an ni. An sum dinhmun pawh tunah chuan a ṭha ta hle. Deloitte Money League-in a tarlan danah chuan football club sum lalut ṭha 12-naah an awm.

Fans chungchang sawiin Ricken chuan, "2014-15 season chanve chhoah khan Jurgen Klopp-a hnuaiah 17-naah kan awm. Amaherawhchu supporter-ten Klopp-a hnathawh an hria a, a hnu lama kan chak loh ṭum pawhin an match khelh leh tura inrintawkna an neih theih nan an la au phur zawk. Nomawi a pawimawh a, chutihrualin rilru put hmang te, tlawm duh lohna thinlung leh tih tak taka beihna a pawimawh a ni," a ti.

Borussia Dortmund hian Lucien Favre hnuaiah pathumna dinhmun an luah mek a, hmahruaitu Bayern chu point liin an phak lo. Zanin dar 1:00 hian Signal Iduna Park-ah Eintracht Frankfurt an mikhual dawn a, champion an tum a nih chuan point thum hlawhchhuah ngei a ṭul ang.



Share this Post

Login to comment
No Comments