Roma hnehtu Juve an chuang sang

Juventus chuan inkhel tir lama an goal hnih khung hmangin AS Roma 2-1 in an luhchhuah a, Italian champion hian Serie A hmahruaitu Inter Milan nek chhuakin a chung berah an awm leh ta - point hnihin hma an hruai.

Pathianni zan khan Maurizio Sarri naute hian a tir lam minute 10 chhungin goal hnih an khung. Minute thumna lekah Paulo Dybala free kick aṭanga ball kal chu Merih Demiral-a'n a khung a, minute 10-naah Argentine striker Dybala hian penalty hlawh chhuak lehin Cristiano Ronaldo-a'n an goal hnihna khung nan a hmang.

Tlarhma ṭha

Juventus hian hrem vangin Rodrigo Bentancur an chhawr thei lo a, player pawimawh Giorgio Chiellini leh Sami Khedira te chu hliam vangin an chhawr thei lo - Aaron Ramsey leh Merih Demiral ten inkhel bul an ṭan thung.

Stadio Olimpico-a inkhelah Juve lam an tlangnel hle, tun hnai a match hnuhnung pasariha goal kua ngawt khung thei Ronaldo a khel ṭha tluang leh tawh a, Dybala a awm bawk avangin tlarhma lam chu an ngaihtuahawm loh. Striker Gonzalo Higuain chu goal thumna khungah inngai mah se a goal khung chu offside vanga pawm a ni lo.

Captain Chiellini hmun ruak erawh hnawhkhah a harsa, inkhel bul ṭantu Demiral chu minute 20 pawh a khelh hmain khup hliam vangin thlak a ngai; Dutch rawlthar Matthijs de Ligt-a'n tun hnaiah tihsual ngah mah se a khelh leh a ngai - Ajax captain hlui hian Roma midfielder Nicolo Zaniolo a hliam zui leh bawk.

Hliam vanga buai

AS Roma hi tun hnaiah khel ṭha mah se Juve lamah an ṭhat dan berin an khel lo, Javier Pastore, Federico Fazio, Henrikh Mkhitaryan, Davide Santon, Justin Kluivert leh Davide Zappacosta te an chhawr thei lo vek; buaina tham a tling.

Goal hnih an phurh hnuah pawh Roma an beidawng lo, khelmual chhunga fans pungkhawm thawm a ṭha reng bawk. Minute 68-naah Diego Perotti chuan panlty aṭangin si phurh a sut 

ṭhen. Aleksandar Kolarov-a'n goal khung theihna hun nei mah se a free kick chu bar chung hretah a kal a, hnai tak aṭangin a tauh 'over' hlauh bawk.

Serie A aṭanga Champions League hmun ruak inchuh boruak a sang chhunzawm dawn, an chak loh avangin Roma hi palina aṭanga nek chhuah an ni - panganaah awmin Atalanta chu an chungah an rawn inhlangkai.

A la tawk lo

Juventus manager Maurizio Sarri chuan point thum an hmuh vanga a lawm thu a sawi a, chutihrualin a chung bera an awmna chu hmun nghet a la nih bik loh thu a sawi bawk; nomawi an kawl lai hi a la him rih lo hle tih a hre chiang.

Sarri chuan, "Minute 60 chhung kha chu kan khel ṭha hle, a hnu lam erawh kan buai deuh. Roma khelmuala point thum hmuh hi chu thil harsa tak a ni, hun rei zawk kan khelh ṭhat avangin hnehna kan chang hram," a ti. Gonzalo Higuain-a'n a thlak avanga lungawi lohna lantir Dybala chet dan chu thil thleng pangngai a nih thu a sawi bawk.

Juve hian nikum December thla khan Lazio an ngam lo a, a hnu lamah erawh an insiamṭha leh tawh. An league match hnuhnung paliah hnehna chang vekin a zawna a vawi kua nen Italian champion nih an tum mek a ni.

Inkhel dang

Fiorentina a enkawl hnua a vawi khat nan manager Giuseppe Iachini chuan hnehna a chang ve ta, hun tawp dawn lama German Pezzella tauh luh hmangin table mawngphaha awm SPAL chu 1-0 in an hneh a, anni hi 14-naah an kaisang thung.

Hellas Verona chuan pariatna dinhmun luah turin Genoa 2-1 in an hneh. Sampdoria pawhin goal khat an phurh hmasak zet hnuah Brescia 5-1 in an sawp let a, season kal laia league match bika an chak chian ber ṭum a ni.

Inrinni zan khan Inter Milan leh Atalanta te 1-1 in an inhnehtawk tawh a, tun hnaia team hmuhnawm tak mai Lazio chuan hnehna an lo chang tawh bawk. Nomawi inchuh bakah UCL ticket inchuh thawm a na chho hle.



Share this Post

Login to comment
No Comments