RG Stadium floodlight thar hnuaiah Zaninah MPL8 semifinal:

Mizoram chhunga khelmual ṭha ber RG Stadium, Mualpuiah floodlight thar dah a ni a. Zanin hian a hawnna hun neih a ni ang a, Mizoram Premier League Season 8 semifinal khelh zui a ni ang.

RG Stadium-a zan inkhel hmasa berah hian Aizawl FC leh Chanmari FC te an inhmachhawn dawn a, inkhel hun hi dar 7:30 a ni ang. Mizoram infiamna chanchina chuang reng tawh tur a ni a, football ngaina leh ngaina lo tan pawh chhim ngei chi a ni.

A êng dawn

RG Stadium hi I League khelhna hmun a ni a, India rama inelna sang hi tlai lamah khelh ṭhin a ni. Mizoram sports minister Robert Romawia Royte chuan, "Mizoramah I League khelh a ni tawh a, hetah hian kan lungawi tur a ni lo. Inelna lian zawk pawh thleng zel thei turin infrastructure kan neih ṭhat a ṭul. RG Stadium-a kan light dah hi international standard a ni a, I League chauh ni loin ISL leh international match thleng thei tura kan inpeih a ngai," tiin a hma thlir Vanglaini a hrilh.

Lammuala light dah hi tun dinhmunah chuan 600 lux vel ni tura ngaih a ni a, RG Stadium-a light dah hi 1200 lux vel a ni a, Lammual letin a êng dawn tihna a ni. Floodlight thar hi mamawh dan a zirin la tih ên belh a ni a, amaherawhchu light dah belh hian a man a tihsan belh bakah enkawl a tih hautak avangin Mizoram mamawh tawka siam phawt a ni.

Robert Romawia chuan, "Mizoram Football Association nen inthuruala RG Stadium zan inkhel hmasa bera MPL semifinal khelh a ni tur hi a lawmawm ka ti. I League fixtures pawh hi tlai dar 2:00-ah dah ni mah se inkhelh hun hi thlak theih a ni a, zan lamah an khelh theih thuai kan beisei," tiin a sawi.

Lammuala floodlight san zawng hi 25m a ni a, RG Stadium-a floodlight erawh 40m daih niin ball kangah player-te pawhin harsatna an nei tawh lo tura ngaih a ni.

A nuam dawn

Mizoram chhungah chhungkua leh ṭhianhoa chhuahna tur a tam lo a, MPL semifinal hi hun ṭha a ni thei ang. RG Stadium-ah parking-na hmun a ṭha a, December zan boruak nuam takah inkhel hmuhnawm thlir tur a awm dawn.

Stadium chhehvelah ei leh in lei tur a awm ṭha a, semifinal hi MPL hun bik a nih avangin zan lama khawpui chhuah tinuamtu 'food truck' pawh an ding ang. 

Chhungkuaa kalna tlak hmun nuam leh boruak ṭha tak hnuaiah kan footballer ṭhate inkhel a en theih dawn e.

Aizawl FC - Vawi 3 champion tawh

MPL3, MPL4 & MPL7

MPL8-a  AFC tana goal khung tamte

F. Lalremsanga10

Alfred Keimah Jaryan 8

Rochharzela6

Isak Vanlalruatfela4

Chanmari FC - Vawi 2 champion tawh

MPL2 & MPL5

MPL8-a CFC tana goal khung tamte

David Lalrinmuana4

Lalnunzama 4

Lalremruata4

MS Dawngliana2

 MPL Season 8

SEMIFINAL

Leg 1 – December 3, Thawhlehni

Aizawl FC07:30 PMChanmari FC

Leg 1 - December 4, Nilaini

Chhinga Veng07:30 PMElectric Veng

Leg 2 – December 10, Thawhlehni

Electric Veng07:30 PMChhinga Veng

Leg 2 – December 11, Nilaini

Chanmari FC07:30 PMAizawl FC

FINAL - December 14, Inrinni



Share this Post

Login to comment
No Comments