Aizawl FC ‘kim lo’ 0-0 Bagan ‘kim’

Tun season I League inkhel hmasa ber chu November 30, Inrinni khan RG Stadium, Mualpuiah khelh a ni a, champion rinkai zinga mi Mohun Bagan leh Aizawl FC te chu goal awm loin an inhnehtawk.

Mohun Bagan hian Spanish coach Jose Anonio Vicuna kaihhruaina hnuaiah champion ngei an tum a, season ṭantirh aṭangin foreigner paruk nei nghalin Mizo club lakah chhawr kim vek mah se point khat hmua Aizawl an chhuahsan hi an vannei tia sawi theih a ni.

Puitling vs Rawlthar

I League danah foreigner panga bul 

ṭantir nghal theih a ni a, Mohun Bagan-in tlarhnungah Trinidad and Tobago international Daniel Cyrus leh Franciso Morante te an inkawptir a. Left back-ah captain Dhanachandra Singh aiah vice captain Gurjinder Kumar luhtir a ni a, right back-ah Aizawl FC star hlui Lalramchullova a awm. Goalkeeper-a awm pawh tawnhriat nei ṭha Debjit Majumber a ni.

Spanish player zinga an sawi vul ber Joseba Beitia chuan jersey no. 10 hain midfield luahlumtu a ni a, a hnampui Francisco Munoz nen an inkawp. Wing-ah India Under 17 World Cup khel Nongdamba Naorem leh Brittto M te an awm. Kerala lam mi Britto hi Services tana Santosh Trophy vawi hnih champion tawh a ni. 

Tlarhmaah Spanish player Julen Colinas leh VP Suhair te an awm. Kerala forward kum 27 mi Suhair hi Gokulam Kerala leh East Bengal tana khel tawh a ni a, dahhniam theih a ni lo. Spanish coach Jose Anonio Vicuna-a'n tawnhriat nei ṭha ṭhiau bul a ṭantir a, bench-ah Villarreal leh Barcelona B team-a khel tawh Salva Chamorro a la dah thei bawk.

Aizawl FC-in foreigner pahnih Alfred Kemah Jaryan leh Richard Kassaga te chauh an kawl rih a, nomawi an chawi ṭuma forward pawimawh William Lalnunfela'n bul ṭan bawk mah se I League-a an tawnhriat aṭanga teh chuan Bagan hmachhawntu Mizo team hi rawlthar rual tiin an sawi theih.

Bagan an ṭha

Mohun Bagan-in team ṭha zawk an ni tih pholangin Julen Colinas-a'n a chance neih hmasak ber chu goal ban pawnah chiah a pet a, midfielder Beitia killer pass chu VP Suhair-a'n ṭha takin pet mah se I League-a vawi khat bul 

ṭanna keeper Lalremruata'n a dang ṭha takzet.

Mariners-in Aizawl FC an rum ṭhaih chhunzawm a, Francisco Munoz-a ball pet kawh zet defender C. Lalrosanga'n a dan leh Morante te tauh over te chu Mizo club ṭantute tan chuan thinphu ngai renga en liam chi a ni lo.

AFC an thiam

Khelh thut lu hai a reh a, Aizawl FC rawltharten an thiamna an pholan chinah erawh Mohun Bagan aiin Mizo club an khel ṭha tawh zawk. Standly Rosario-a'n midfield-ah an hneh lo tih hriain Alfred Kemah Jayran chu a pawt let a, AFC captain hian a hna a tlin hle.

Mizo rawlthar ball thiam Rochharzela leh Isak Vanlalruatfela te chu Spanish player-te aiin an ball khawih hmuh a nuam a, Bagan tlarhnung tan harsatna an siam nasa hle. Chutihrualin William Lalnunfela erawh goal hmaah a vannei lo a, Kolasib tlangval hian minute 42-naah offside trap bumin keeper Debjit chiah hmachhawnin a ti goal lo. Minute khat hnuah William-a bawk hian tauh goal theih tura ngaih chu chest thlain keeper Debjit-a'n a tibuai hman bawk.

Second half ṭantirhah Aizawl FC passing a mawi lehzual a, foreigner nena inrem Bagan midfield leh tlarhnung an ṭhiat mawi thei hle. Amaherawhchu goal hmaah AFC rawltharte puitlin lohna a lang a, Rochharzela'n a ṭhiante pass tur awm renga goal-a a pet ta zawk te chu inkhela goal luh lohna chhan zinga mi a ni. 

Mipui an fak

Aizawl FC coach Standly Rosario chuan, "Inkhelh ṭantirhah kha chuan kan tisual ve bawk ang chu. Foreinger rual hmaah kha chuan kum lama naupang tan chuan zam awl tur deuh a sin. Ka naute ka dem lo a, an khel ṭha ka ti a, ka chhuang takzet. Point khat hmuh hi kan phu a, vanneih ṭum ni se point thum hmu zawk tur kan ni," tiin Vanglaini a hrilh.

Standly chuan sawi chhunzawmin, "Inkhel entu mipui kha ka beisei phak bakin an ṭha a, an thawm khan kan team tan phurna nasa tak min siam a ni," tiin entu mipui a fak a, official record-ah chuan entu zat hi 7642 a ni.

Spanish coach Jose Anonio Vicuna chuan, "A tir lama chance kan hlah kha a pawi a, kan khingpuite an khelh ṭhat avangin point thum kan hlawh chhuak lo. Chutihrualin RG Stadium hi artificial turf a ni a, khelh a harsa. Kan duh angin kan khel thei lo a, kan muala kan khelh hunah chuan Mohun Bagan ṭha zawk kan hmuh ka ring. Aizawlah hian team dang pawh an rawn la khel dawn a, point khat hmuh pawh a harsatzia an rawn hre chho ang," tiin an beisei ang result hlawh chhuak lo mah se RG Stadium-a point khat hmuh chu a chhiat loh thu a sawi.

Inkhel dang

Gokulam Kerala FC chuan an mual EMC Corporation Stadium-ah Neroca 2-1 in an hneh. Kerala club tan hian Henry Kisekka (43') leh Marcus Joseph (49') ten an khung a, AFC coach hlui Gift Raikhan-a enkawl Neroca tan Taryk Sampson-a'n goal khat a khung ve bawk.

Manipur club tan hian Zodingliana'n bul a ṭan a, Gokulam Kerala tan hian Lalromawia chu bench ṭangin a rawn lut ve bawk. 



Share this Post

Login to comment
No Comments