2nd Aijal Club Challenger Tennis League Huaisen takin K-12 Acers an champion

Tualchhung tennis inelna lian leh ngaihhlut 2nd Aijal Club Challenger Tennis League-ah K-12 Acers an champion. Chak lo tura rin an nih hnuah K-12 hian huaisen taka bei letin Chanmari Slammers chu 26-23 in an hneh.

Inrinnia final inkhel hmuhnawmah K-12 tan men's doubles huangah Basil L Khuma leh Joseph Z Khuma te chuan match pawimawh takah 2007 Wimbledon second round khel tawh Vishnu Vardan leh Mizoram number 1 Lalhmachhuana te ṭangdun chu 5-4 a hnehin a vawi khat nan an champion.

Thawhlehna

Aizawl Tennis Club-a inkhelah league round lama hmahruaitu Chanmari lamin bul an ṭan fuh, an intawn hmasakah 30-24 a hnehna an chan tawh bawk avangin inrintawkna an nei sang. Kunal Anand (men's singles) leh Bushan Haobam (boys under 16) ten an khingpui te 6-1 leh 6-1 in an hneh; nomawi an hnaih hman hle.

Mahse, inkhel a la zo lo. 35+ doubles khelh zui a ni a, K-12 Acers tan Paul Khuma leh Chandra Sekhar Mohanty te chuan Lalhmunmawia leh Stephen Lalhriatpuia te chu 6-0 ngawta sawpin beiseina mei mit ṭep tawh chu an chhem nung.

India hmeichhe number 23 Sai Samhita chuan K-12 boruak siamṭha zual turin Kaavya Sawhney 6-3 in an hneh zui a, team pahnih te an intiattawk chho ta hle. Basil L Khuma leh Samhita ten mixed doubles chu 6-4 in an la zui leh a, a tira che ṭha lo zawkin hma an hruai let.

Men's doubles-ah Basil L Khuma leh Joseph Z Khuma ten 2007 Wimbledon seond round khel tawh Vishnu Vardan leh Mizoram number 1 Lalhmachhuana te ṭangdun chu 5-4 a hnehin champion an nemnghet, hma an hruai fal tawh avangin game khelh zawh ngai loin chak tur hi a chiang a ni.

Inelna lian

Mizoram Tennis Association hnuaia inelna lianah hian season hmasa khan Zarkawt Xenons an champion a, kuminah erawh champion lai hian league round an khelh ṭhat loh avangin final an thleng zo lo.

Team panga inelte vawi khat ṭheuh an inkhelh kual hnuah a sang pahnihin nomawi hi an inchuh. Team thar Chanmari Slammers hi league round hmahruaitu an ni a, mahse nomawi inchuhna inkhelah an hnuaia awm K-12 an ngam lo.

K-12 captain Joseph Z Khuma chuan, "Tennis hmasawnna kan duh a, chumi tur chuan theihtawp kan chhuah ṭhin. Tunah inelna lian kan nei ta a, state pawn player lakah pawh tualchhung player-ten theihna an nei tih a lang. Hmasawnna hmuh hi a nuamin a hlimawm," tiin Vanglaini a hrilh.



Share this Post

Login to comment
No Comments