Bayern an chesual, hmahruaitu Leipzig

Bayern Munich chuan Inrinni zan khan an mual Allianz Arena-ah player 10-a khel Bayer Leverkusen 2-1 in an hneh lo. Bundesliga inkhel dangah RB Leipzig-in Paderborn 3-2 in an hneh a, hmahruaitu an ni.

Bayern an vanduai

Bayern Munich-in manager lailawk Hansi Flick hnuaiah match liah goal 16 an khung thei a, Inrinni zana Bayer Leverkusen an mikhual ṭumah erawh goal hmaah an chefuh thei lo.

Bavarians hian goal chance ṭha an nei nghal a, Serge Gnabry-a'n keeper chauh a hmachhawn hnuah a ti goal lo. Leverkusen winger Leon Bailey erawhin hun ṭha hlah ve lo a, minute 10-na lekah chiang zetin a pet goal.

Goal khung khawl Robert Lewandowski leh Ivan Perisic ten chance ṭha bik an hlah chho a, Thomas Muller-a'n tun season-a a goal hmasa ber minute 34-naah a khung thung. Amaherawhchu Leon Bailey bawkin minute khat hnuah Leverkusen hmahruaina a khung lehnghal.

Bayern hian second half-ah pawh nawr chhunzawm mah se Leverkusen an vannei tluan a, minute 81-naa defender Jonathan Tah hnawhchhuah a nih hnuah pawh goal chhuah belh tawh loin point thum hlu tak an hlawh chhuak.

Inkhel dang 

Bavarians hmelma Borussia Dortmund pawhin defender pawimawh Mats Hummels hnawhchhuah a nichungin Jadon Sancho leh Thorgan Hazard te goal hmangin Hertha Berlin 2-1 in an hneh.

Hertha hi Jurgen Klinsmann hnuaia an hmatch hmasa ber a ni a, Germany national team coach hlui hian chak loin bul a ṭan. Dortmund erawh Bayern laka 4-0 an chak loh hnua hnehna an chan leh tak avangin point khat chauhin champion lai hi an pha lo.



Share this Post

Login to comment
No Comments