Tokyo-ah Farah kan hmu dawn

Olympic champion vawi li ni tawh Mo Farah chu nakkuma neih tur Tokyo Olympic-ah a inlan leh dawn a, British long distance runner hi 10,000m huangah a title kawl lai humhim tumin a inlan ang.

Kum 36 mi Farah hian 2017 khan intlansiak pangngai hi chu a chawlhsan a, kawng thui intlansiak ‘marathon’ lamah erawh a inhmang chhunzawm thung.

Olympic-ah a inlan dawn tawh lo nia ngaih a ni a, mahse 2012 leh 2016 Olympic-a 5,000m leh 10,000m intlansiak champion hian a thutlukna sutin infiamna khawmpui lian a hmachhawn leh dawn.

Farah chuan, “Nakkumah chuan intlan-siakna ka hmachhawn leh ang, Japan khawpuiah 10,000m inelna hmachhawn ka tum. Ka tlan chakna a tlak hniam hman loh ka beisei a, ṭha taka inelna hmachhawn thei turin theihtawp ka chhuah dawn a ni,” tiin a sawi.



Share this Post

Login to comment
No Comments