Bayern tlin zanah Son langsar

Bayern Munich chuan Champions League last 16 an lut a, group B inkhel dangah Tottenham Hotspur chuan Son Heung-min-a goal hnih hmangin Red Star Belgrade 4-0 in an luhchhuah.

Nilaini zan Allianz Arena-a inkhelah Bayern tan Robert Lewandowski chuan a tih ṭhan dan pangngaiin goal a khung leh a, Poland international bakah hian Ivan Perisic-a'n goal khat thawh vein German champion hian Olympiakos 2-0 in an hneh a ni.

Bayern an tho chhuak

Niko Kovac an ban hnua an match hmasa berah assistant coach Hansi Flick chuan Bayern hi a kaihruai a, chak nghal mah se goal khung tur erawh chuan an nghah rei a ngai. Minute 69-naah Kingsley Coman-a cross chu tawih zetin a kheng lut zeuh.

Season kal laiah Lewandowski hian Bayern tan Bundesliga leh UCL-ah match 14 khel tawhin goal a la khung vek a, goal 20 a nei der tawh. Lewy goal khung hnuah Inter Milan aṭanga an hawh Perisic-a'n a khung ve zui a, defender Benjamin Pavard erawhin a hun ṭha neihah goal ban a tauh per thung.

Bundesliga palina nilai Bayern hian Inrinni zan dar 11:00 hian an elpui Borussia Dortmund an mikhual dawn a, manager lailawk Flick-a'n a kaihruai leh ang; a hnu lamah erawh international break a awm bawk avangin manager nghet an neih hman tawh a rinawm.

Son-a goal hnih

Son Heung-min chuan Everton midfielder Andre Gomes laka chanchin duhawm lo a neih hnuin huaisen takin a rawn ding chhuak, South Korea international hian Red Star Belgrade lakah goal hnih khungin a club hi UCL last 16 luh beiseina a chhit nunsak.

Spurs forward Son bakah Giovani Lo Celso leh Christian Eriksen ten goal khat ve ve an khung bawk a, an elpui an sawp avangin point sarih an nei a, an chunga awm Bayern hnungzui turin an dinhmun a ṭha ta hle.

Tottenham manager Mauricio Pochettino chuan, "Red Star Belgrade khelmual hi Liverpool, PSG leh Napoli te pawhin tun hma deuha hnehna an chan zawh lohna hmun a ni a, inkhelh hmain a harsat tur thu kan sawi hnem hle. Hmun harsaah ṭha taka kan khelh theih avangin a lawmawm," a ti.



Share this Post

Login to comment
No Comments