Harden-a hoten Warriors an hneh

NBA regular season match kua an khelh tawh aṭanga a vawi nga nan James Harden chuan point 30 chuang a nei leh a, nimin zing khan a khelhna Houston Rockets chu Golden State Warriors lakah 129-112 in hnehna a chanpui.

Toyota Center-a inkhelah Harden hian GSW lakah point 36 a score bakah assists vawi 13 ngawt a nei a, season kal laia a vawi nga nan hnehna an chang. Pathianni zing dar 6:30 hian Chicago Bulls nen an inhmachhawn leh ang.

Golden State erawh season bul an ṭan fuh lohna aṭangin an la tho chhuak thei lo, match ruk an tlawm tawh - vawi hnih chiah an la chak. Inrinni zingah Minnesota Timberwolves nen an inkhel leh dawn.

Nimin zing NBA inkhel dangah Los Angeles Clippers chu Kawhi Leonard tel loin an inlan a, an khingpui Milwaukee Bucks lakah 129-124 in an chak lo. Bucks tan hian Giannis Antetokounmpo chuan point 38 zet a neih bakah rebound vawi 16 a la bawk.



Share this Post

Login to comment
No Comments