Khawvelin 'Rodrygo' a hre ta

'The New Neymar' tia hminglem an pek Brazilian forward Rodrygo chuan Paris St-Germain star nen huang khata dah turin a ṭha tawk tih a pholang a, Real Madrid tan Champions League-ah hattrick a siam. 

Nilaini zan khan Real hian Champions League group stage inkhelah Galatasaray chu 6-0 in an sawp a, Karim Benzema (2 goals) leh Sergio Ramos ten an khung ve bawk. 

Real-in hnehna an chan avangin last 16 luh beiseina a nung thar leh ta a, match li an khelh aṭanga point sarih neiin group A-ah pahnihna dinhmun an luah mek. 

PSG-in an mikhual Club Brugge chu 1-0 a hnehin last 16 an lut chiang a, French club tan Mauro Icardi chuan inkhela goal awmchhun hi a khung.

Fapa pekin an awm ta!

Real Madrid-in Santos-a a khelh lai aṭang tawhin Neymar lakluh an tum a, Brazilian forward duhawm hmin turin an hmelma kumhlun Barcelona an ngam lo. 

Neymar ang thoa Santos chhul chhuak Rodrygo a awm a, Real-in chan nawn an tum lo. June 2018 khan Spanish club hian an be fel der tawh a, Madrid khaw club a zawm erawh June 2019 a ni. 

Real-in Neymar chang lo mah se 'the new Neymar' an chang a, kum 18 mi forward hian Nilaini zan khan Spanish club-in kum naupangte a nih lai aṭanga an atchilh chhan a pholang. 

Brazilian forward hian minute lina lekah a ke veilam hmangin hmahruaina goal a khung a, La Liga match li a khelh tawha goal hnih khungtu tan a bul ṭanna chauh a ni. 

Defender, lo kiang ru le

Minute thum a liam a, Rodrygo bawk kan hmu. Marcelo bawkin a siamsak a, Brazilian left back ball cross hi harsatna nei loin a tauh lut - Champions League-a minute sarih chhunga goal hnih khung thei hmasa ber a ni. 

Rodrygo hian Champions League-a hattrick siam thei rang ber ni turin hun duhawm a nei nghal. Minute 14-naah Steven Nzonzi chuan Toni Kroos a ti tlu a, penalty a chawi. 

Santiago Bernabeu-a fans pungkhawm ten Rodrygo chu penalty pet tura rawn pen chhuak turah an ngai a, mahse Sergio Ramos zawk a rawn pen chhuak! Spanish defender hian harsatna nei loin goal-ah a chantir. 

Champions League-a hattrick siam rang ber record siam turin Rodrygo dan ni mah se 'hattrick' hrim hrim erawh dan theih a ni lo a, hun pek belhah a goal thumna a khung. 

A karah Benzema

Rodrygo hming lansarh karah Karim Benzema lam hmaih a thiang lo a, French striker hian goal hnih a khung - first half zawh hma hreta a goal khung chu Rodrygo siamsak a ni. 

Benzema hian hun pek belhah Rodrygo hi a duhsak ve leh a, a hattrick siamna tur goal a siamsak - Brazilian rawlthar hian a ke veilam, lu leh ke dinglam hmangin goal a khung a, 'perfect hattrick' tia an sawi ṭhin a siam. 

Rodrygo chuan, "Bernabeu-a ka hming an sa rual dual dual kha chu a takin mumang ram a thleng a ni ber. Ka hlim em em a, zan hlimawm bik tawng ni mah ila phi chung lo turin ka rilru siam rem hram hram a ni," a ti!

Real boss Zinedine Zidane chuan, "Mak ka ti hran lo a, engkim a nei a ni. Player fing leh che reng tak, inzir reng chunga hmasawn duh mi a ni. A taksa tih chak a la mamawh a, thiamna lamah chuan a duh tawkin ball hmangin thil a ti thei. Kum 18 mi chauh a la ni a, footballer naupang tak hetianga an khel thei hi chu hmuh nuam ka ti," tiin a sawi. 

A thiam 16-ah PSG

PSG-in minute 16-na lekah goal an khung a, lei hrula Kylian Mbappe cross chu Angel Di Maria-a'n lo pet hman lo mah se Icardi chuan harsatna nei loin hnai set sawt aṭangin a khung. 

Mahse, French club-in beisei an phak lo chhunzawm. Belgian club-in huaisen takin chak an tum ngam a, Emmanuel Bonaventure Dennis leh Diagne 'shot' ṭha tak chu Keylor Navas-a'n a dansak. 

Real Madrid goalkeeper hlui hian penalty-ah PSG a chhanhim zui a, captain Thiago Silva penalty chawi chu Mbaye Diagne-a'n a pet ṭhat tawk loh avangin Navas tan dan a harsa lo. PSG hi 1-0 in an chak a, last 16 an lut. 

PSG hian December 2004 hnuah Parc des Princes-a Champions League group stage match an khelh hnuin tlawm an la nei lo a, record duhawm an chhawm nung zel. 



Share this Post

Login to comment
No Comments