Schweinsteiger a chawl ta

FIFA World Cup 2014-a Germany champion puitu Bastian Schweinsteiger chuan inkhelh a chawlhsan thu a puang. Bayern Munich leh Manchester United midfielder hlui Basti hi kum 35 mi a ni a, MLS club Chicago Fire-ah hun hnuhnung a hmang.

A hun thleng ta

Bastian Schweinsteiger chuan, "A hun chu a thleng ta. Ka team khelh tawhna Bayern Munich, Manchester United, Chicago Fire, Germany national team bakah min ṭantute chungah lawm thu ka sawi. Ka nupui Ana Ivanovic leh ka chhungte min thlawpna hi sawi hmaih a thiang lo bawk," tiin a chawlh thu Thawhlehni zan khan twitter-ah a ziak.

Germany captain hlui chuan, "Football mangṭha tura thutlukna han siam meuh chuan lung a ti leng lawk hle. Chutihrualin ka hmaa chona hmachhawp hian phurna min pe ve bawk. Football tan hian ka rinawm reng ang," tiin a sawi.

Kum 35 mi Schweinsteiger hi a club khelhna Chicago Fire-in tun season MLS playoff an khel phak dawn lo tih a chian zawhah a chawlh thu hi a puang.

Lung a leng

Germany ṭantuten an theihngilh tawh loh tur chu kum nga liam taa thil thleng kha a ni a, Die Mannschaft hian 2002 World Cup final-a an hneh loh Brazil chu 7-1 in an sawp.

Rio de Janeiro-a thil thlengin mipui a hneh. July 14, 2014 zanah Germany-in final-ah Lionel Messi telna Argentina an tum a, extra time-a Mario Gotze goal hmangin hnehna an chang.

Hemi ṭum hian Schweinsteiger mit hnuai chu a kak a, chutichung chuan German midfielder hi midfield lai lum luahtu niin a thawhrimna hmangin team a kaihruai a, a khelh dan rorum leh huaisen tak chuan football ngainatute thinlung a hneh hle.

Mi bik Basti

Bastian Schweinsteiger hi Bavaria chhim lam Kolbermoor-ah a piang a, kum thum a nihin a vawi khat nan ball a pet. Kum 14 mi a nihin Bayern Munich youth team-a awm turin an lalut a, kum 2002 kum tawp lamah kum 18 mi niin professional contract a ziak.

Ottmar Hitzfeld chuan November 2002 khan Schweinsteiger leh Philipp Lahm te chu Champions League-ah Bayern tana khelhna hun a siamsak a, player pahnih hi Bavarians leh Germany player ropui an ni zui. Basti hian kum 19 mi a nihin ram tan a khel ṭan a, hetih lai hian winger ni mah se centre midfield-ah inletin player ṭha ber zinga mi a ni zui zel. 

Bayern-in Jupp Heynckes hnuaia kum 2013-a treble champion an nih khan Schweinsteiger hi player pawimawh a ni. Heynckes chuan, "Schweinsteiger hi player rem hre bik a ni a, amah hi film director ang mai niin inkhelh hma hian tum dan fel tak 'script' a nei sa ṭhin. Team tan a theihna zawng zawng a hlan a, ama tan a khel ngai lo - team tan a khel ṭhin," tiin a player hlui hi a fak hle.

Hlawhtlinna

Bastian Schweinsteiger hian Bayern Munich chu Bundesliga-ah vawi riat a champion pui a, DFB-Pokal nomawi vawi sarih chawiin club inelna ngaihhlut ber Champion League-ah a champion pui bawk.

German midfielder hian Bayern a chhuahsan hnuah Manchester United leh Chicago Fire tan khelin a club hnuhnung pahnihah a hlawhtling tawk lo. Schweinsteiger hian ram tan pawh sulhnu ṭha tak nei a, FIFA World Cup an champion hnuah Philipp Lahm-a'n inkhelh a chawlhsan avangin captain atan ruat a ni.

Basti hi 2004 leh 2016 chhungin ram tan vawi 121 a inlan a, Germany coach Joachim Low chuan, "Germany history-a player ropui ber zinga mi a ni," tiin a dahsan thu a sawi.



Share this Post

Login to comment
No Comments