Pepe nek chhuak thei an awm - Wenger

Arsene Wenger chuan Arsenal player manto ber Nicolas Pepe chu theihna nei sang tak ni mah se a dinhmun a nghet bik lo tih a sawi a, a khelhna hmun luahlan thei player naupang zawk an awm nia a hriat thu a sawi.

Pound maktaduai 72 man Pepe hian Gunners tan goal khat chauh a la khung, chu pawh Pierre-Emerick Aubameyang-a'n penalty a pettir aṭangin a ni - a ṭhiante khung tur erawh vawi hnih a siamsak tawh thung.

Arsenal manager hlui Wenger chuan, "Pepe hi ka player duh zawng tak a ni, ani an lalut hi thutlukna dik tak ni pawhin ka hria. Ligue 1 lama a khelh dan nen chuan khaikhin chi a la ni rih lo ang, hun a la mamawh deuh a ni.

"A ball chan a nghetin a inringtawk hle a, a theihna ang taka a khelh chhuah hun a la awm ang. Mahse, hriat tel ngai erawh chu a dinhmun hi a nghet reng bik ka ring lo, Gunners hian rawlthar ṭha tak tak a khelhna hmuna khel thei an nei," a ti.

Unai Emery-a'n Pepe a ringtawk a, inkhel bul ṭantu zingah a telh ṭhin. Amaherawhchu, Spanish manager hi Wenger ang thoa player naupang zawk chhawr ngam a ni. Season kal laiah pawh a kalphung ngai hi a chhawm.

Ivory Coast international Pepe hi Bournemouth nen an inkhelh ṭumin Gabriel Martinelli-a'n a thlak a, Manchester United lakah pawh Reiss Nelson chuan a rawn thlak bawk - Wenger sawi angin Pepe hi a hriam tawk lo a nih chuan thlak theih reng a nih hmel.



Share this Post

Login to comment
No Comments