Mizo boxer-ten medal la pha lo

4th Elite Men's National Boxing Championship, Paddi, Himachal Pradesh-a neihah Mizoram Boxing Association (MIZBA) in boxer pali an tir a, medal la pha an awm lo.

Nimin quarterfinal inkhelah Laldingliana (57kg) leh Vanlalawmpuia (63kg) te an chak zo lo. Hemi hma hian H. Lalrinhlua chu first round-ah a tla a, Zochhuanawma Fanai tawpna pawh pre-quarterfinal a ni.

Bantamweight (57kg) quarterfinal-ah Dinga'n Rajasthan boxer Roshan Sain a hmachhawn a, split decision (3-2) in an chak lo. 

Mizoram manager Lalhmingmawia Ralte chuan, "Kan hmuh dan chuan round tinah Dinga hi a che ṭha zawkah kan ngai a, thutlukna duhawm lo tak avangin review tura ngenna kan thehlut," tiin an chak loh dan chu pawm dam theih a nih loh thu Vanglaini a hrilh. 

Lightwelter (63kg) quarterfinal-ah Vanlalawmpuia leh Abhishek Yadav, Uttar Pradesh Boxer te an inhmachhawn a, Khuangthing tlangval chak zo loin Mizote beiseina a tawp.

Hnahthial tlangval Dinga leh Khuangthing tlangval AwP-a te hian medal la pha lo mah se quarterfinal an thlen phak avangin National Games khel turin an tling.



Share this Post

Login to comment
No Comments