Kuminah Lloris inkhel tawh dawn lo

Tottenham Hotspur chuan chanchin lawmawm loh an nei chhunzawm, captain leh goalkeeper ni bawk Hugo Lloris chu kumin chhung a inkhel thei tawh dawn lo, kum tharah a hmel kan hmu leh thei chauh ang.

France international hi kar tawpa Brighton an ngam loh ṭumin a inhliam. Minute thumna lekah Pascal Gross-a cross man a tumna lamah a tlu sual a, a ball hloh chu Neal Maupay-a'n goal hmahruai atan a khung. Lloris hian a kiu a delh sual a, thlak nghal a ni.

Spurs chuan thuchhuah siamin, "Hugo hliam chu zai a ngai dawn lo, mahse dam leh tur chuan hun a duh rei dawn. Kumin tawp lamah training a zawm leh thei chauh ang, tunah chuan a hliam dam leh hun nghakin inenkawl a ngai a ni," an ti.

Kum 32 mi Lloris hi season kal laiah Tottenham tan match riat a inlan tawh, tuna a hliam avang hian ram tan pawh a khel thei dawn lo. France-in Iceland leh Turkey te Euro 2020 qualifier atana an hmachhawn hunah a inlan ve dawn lo tihna a ni.

North London club hian tun hnaiah chanchin lawmawm an nei hlei thei lo. League Cup aṭangin an tla a, Champions League-ah Bayern Munich hneh loin an mualpho hle bawk. Premier League-ah point 11 neiin pakuana dinhmun an luah mek.



Share this Post

Login to comment
No Comments