Point kan hloh hnem tawh - Gundogan

Manchester City midfielder Ilkay Gundogan chuan Premier League-ah point an hloh hnem tawh thu a sawi a, an nomawi erawh humhim theih a la inbeisei thu a sawi bawk.

EPL champion lai Man City hian point riat an hloh tawh, an elpui Liverpool an la chak vek avangin Pep Guardiola naute dinhmun a ṭha tawh lo - title an hum thei a nih pawhin kawng harsa tak an zawh chu a ngai tawh dawn.

Ilkay Gundogan chuan, "Kan dinhmun kan siamṭhat vat a ngai a, a tlem thei ang ber point kan paih a ngai. Kan elpui an chak vek a nih chuan thil a awlsam dawn lo tih chu a chiang a, chutihrual chuan kan theihna zawng zawnga kan beih chuan kawng a la ping lo," tiin a sawi.

Germany international hian 2016 khan Borussia Dortmund aṭangin Man City hi pound maktaduai 20-in a zawm a, league-ah nomawi vawi hnih a chawi tawh. Season hnih liam ta khan EPL-ah point 100 hmuin record an siam a, season hmasa khan point 98 hmuin an title an humhim.

Nomawi inchuh chungchang sawi zuiin Gundogan chuan, "A nihna tak sawi chuan ka dinhmun hi a ṭha lo, ngaihtuah nei loa Liverpool inkhel lo en ringawt pawh a dik chuang lo, ṭhat tawk lohna chinfel hi hna pawimawh ber chu a ni.

"Khelmual chhunga awm player 11 ten tun hma aia ṭha zawka kan khelh a ngai a, match hnuhnung bera Wolves kan hmachhawn aia ṭha khan khelh a ngai tihna a ni," a ti.

Gundogan hi Germany tana khel tura koh zingah a tel a, Nilaini zan dar 12:15 hian world champion vawi hnih ni tawh Argentina nen Signal Iduna Park-ah friendly match an khel ang.



Share this Post

Login to comment
No Comments