Barca-in leiba an ngah

La Liga champion Barcelona-in khelmualah result nei ṭha ṭan mah se pawn lamah chanchin lawmawm lo an neih chhunzawm. 

Spanish chanchinbu lar AS chuan Barca leiba neih thu hi a puang zar a, an tarlan dan chuan Catalan club hian Philippe Coutinho man pawh an 

la pe tla lo. 

Barca hian Coutinho manah hian pound maktaduai 84 bawr vel an la ba a, an sum batna tam zawk erawh Liverpool-ah niloin bank lamah a ni thung. 

Catalan club hian Coutinho chauh niloin Frenkie De Jong, Malcom, Arthur Melo leh Arturo Vidal man pawh an la pe tla lo a, leiba an ngah hle. 

Coutinho man chu

January 2018 khan Coutinho hian pound maktaduai 142-in Barcelona a zawm a, mahse Barca hian Liverpool hnenah sum an pe tla nghal vek lo. 

Chutihrual chuan Coutinho mana pound maktaduai 84 pek tur an la neih erawh a tam zawk hi bank pawisa tur a ni a, Reds hi chuan pound maktaduai 4.5 chiah an dawn belh tawh dawn. 

Barca-in pound maktaduai 84 an ba aṭang hian pound maktaduai 24 chu tun season zawh ruala an pek tur a ni dawn a, pound maktaduai 60 pek hun tur erawh bithliah a awm lo. 

Catalan club ṭantute tana thu hriat nuam lo tak tur chu Coutinho hian Bayern Munich-ah loan-in a khel leh daih tawh a, a ngheta luh theih dan a nei - an duh tawh loh player vanga heti zat sum la bat hi a rulh lam a phurawm tehchiam lo ang. 

Liverpool tan lawmna

Barca hian pawisa tam tak la ba mah se Reds lakah ba an neih tam tawh loh avangin Liverpool hi chu an hlawk tia sawi ngam a ni a, Coutinho an hralh kha an inchhir lo ang. 

Brazilian forward hralh vangin defender rinrawl Virgil van Dijk leh goalkeeper Alisson an lei theih phah a, season hmasa Champions League nomawi an chawi nana player pahnih 

ṭangkaizia kan hria. 

Barca erawh an che fuh lutuk lo. Coutinho hian match 76-a khelhsakah goal 21 a khung a, assist vawi 11 a nei - beisei a phak lo. 

Andres Iniesta thlak tura lei ni mah se Barcelona legend pheikhawk hnutchhiah a thawl hret a, Nou Camp-ah a kir lehna chance a tlem hle bawk. 

Ba ngah ngah hmelṭha!

Barca hian Coutinho man chauh an ba lo. Nipui transfer-a Frenkie de Jong an lakaluhna lamah pound maktaduai 43 an la ba a, Bordeaux aṭanga Malcom lakluhna aṭangin pound maktaduai 27 pawh an la ba. 

Malcom pawh hi tunah chuan Barca player a ni tawh lo a, Russian club Zenit Saint Petersburg chu August 2019 khan euro maktaduai 40-in a zawm. 

Arthur Melo man aṭangin pound maktaduai 25 an la ba mek a, Arturo Vidal man chu pound maktaduai 9.7 an la ba mek bawk. 

Hriat tel atana ṭha erawh Barca hian an player hralhna aṭanga an sum hmuh tur zat aṭangin pound maktaduai 67 an la dawng bik lo. 



Share this Post

Login to comment
No Comments