Mang neitu ka ni mahna - Jurgen Klopp

Thawnthu danglam tak pakhata bul ṭan phawt a ṭul - a chhan chu kan khawvel piahlama mite hian footballer leh manager te hi Pathian ang maiin min en ang tih ka hlauh ṭhin vang a ni. 

Kristian ka nih avangin Pathian hi pakhat chauh a awm tih ka ring nghet bur a, huaisen taka ka sawi ngam chu football leh Pathian hian inkungkaihna an nei lo, tih hi a ni. Hlawhchhamna tawng tawh vek kan ni a, manager naupang tak ka nih lai khan vawi tam ka hlawhchham tawh. 

Chung zinga ka thawnthu pakhat chu ka hrilh dawn che u a, kum 2011-ah khan ka hruaikir leh dawn che u a ni. Borussia Dortmund ka enkawl lai a ni a, Bayern Munich kan hmachhawn dawn. Kum 20 vel hial chu Munich mualah kan chak zo lo tawh a, kan tan chuan game pawimawh tak a ni. 

Movie ka en aṭang hian nasa takin ka infuih phur ṭhin a, chuvang chu a ni ang, ka naute ti phur tura movie en duhna rilru ka put apiangin Rocky Balboa kha ka ngaihtuah chhuak fo ṭhin. 

Rocky 1, 2, 3 & 4 kha khawvela sikul zawng zawngah hian naupangte en tir se ka duh a, hawrawp zir ngei ngei a ngai ang mai hi ni se ka duh - he film hian i thinlungah tumruhna a tuh lo a nih chuan nangmah lam i dik lo tihna a ni mai. 

Chuvang chuan Bayern kan hmachhawn hma zanin hotel room-ah ka naute chu ka ko khawm a, "Munich khawpuia Dortmund an chak hnuhnun ber chuan a tam zawk hi chuan zun in la cheh a ni," tiin ka hrilh a nih kha!

Rocky IV-a Ivan Drago lanna scene kha ka chhuah zui a, rim taka exercise a la lai, scientist ten an zirchian lai vel kha ka entir chu a ni. Ka player-te hnenah chuan, "Bayern Munich hi Ivan Drago chu an ni. Engkim a ṭha ber vek an nei a, Drago ang thoa dan harsa em em an ni," ka ti a. 

Rocky-a'n Siberia-a training a la lai ka entir leh a, thing kit chunga a in la fit lai, thing tum pu chunga a tlankual laite kha. Ka naute lam chu ka hawi leh a, "In hmu em? Rocky khi kan nih khi! Kan te zawk ngei a, mahse duhna thinlung kan nei a, champion rilru kan pu a, thil theih loh hi kan ti thei a ni," tiin ka hrilh. 

Tui takin ka sawi zel a, ka naute chu ka en leh zauh ṭhin. An rilruah chuan phurna khat se, rawn ding hluai se, Siberia tlang sang taka lawn mai duhna thinlung chu pu se ka duh takzet a ni. 

Mahse, a ni lo. Ngawi rengin an ṭhu a, min en ringawt a, "He mimawl pa hian eng nge maw a sawi le?" tiin zawhna an nei ni berin ka hria. 

Mahse, ka harhchhuak thut. Ngawi teh u, Rocky IV chhuah kum kha 1980 chho vel em ni kha? Ka player-te hi engtik kuma piang nge an nih hlawm? A tawpah chuan, "Nau te u, tu nge Rocky Balboa hria che u?" ka ti ta ringawt mai a ni. 

Pahnih chiahin kut an phar - Sebastian Kehl leh Patrick Owomoyela chiah an ni! A bak zawng chuan, "Tihpalh boss, kan hre ve miah lo," tiin min chhang. 

Ka thusawi zawng zawng kha engmah lo mai a ni a, nuihzatthlak mai a chang zo. A bul aṭangin thu ka sawi leh a ngai a, mahse chu chu nun dik tak chu a ni si. 

Mihring ve mai kan ni a, a chang chuan keimahni hi kan inti mualpho vel mai mai a lo ni. Football chanchina thu ropui ber sawi emaw kan intih lai khan thu holam tak ka sawi a lo ni reng a! Mahse, khua a var a, bul kan 

ṭan ṭha leh ṭhin. 

Match-ah khan kan chak nge kan tlawm ta ka hre zui lo. Mahse, kum 2011-a 3-1 a kan chak hma khan he thu hi ka sawi tih erawh ka hria.

Hei hi football chanchin mi tam takin an hriatthiam loh chu a ni. Result chu kan theihnghilh leh mai a, mahse ka player-te nena kan hun hman leh khang thawnthu nuihzatthlak takte erawh kha chu ka hre reng ṭhin. 

FIFA-in coach ṭha bera min thlang hi ka lawm a, mahse dawhsana, mahni chauha trophy nena din erawh ka nuam tih chi a ni lo. Vawiina ka hun tawn tam takte hi ka player, chhungkua, ka fate leh engmah lo mai ka nih laia ka bula awm tlatte avanga tawng ka ni tih ka inhria.

Dik takin sawi ta ila, kum 20 mi ka nihlai khan vawiina ka hun tawn tur hi miin min hrilh ta se ka awih kher lo ang. Kum 20 mi ka nihlai khan ka hun tawna thil danglam tak ka tawng. Naupang mai ka la ni a, mahse 'Pa' ka ni bawk! Ni e, fa ka nei alawm - dik taka sawi chuan a hun lo tak tak asin aw!

Hetihlai hian amateur football ka khel a, chhunah univeristy ka kal bawk. Ka zirna fee hlawh chhuak turin cinema warehouse-ah ka thawk a, zing dar 6:00-ah film unload leh load chu kan hna ber a ni. 'DVD bak a ni nang' tiin lo sawi reng reng suh u, khatihlaia film chu metal rit taka 'reel' inzial kha a ni a, reel li vel nei 'Ben Hur' te kha an chhuah ang tih ka hlau ṭhin. 

Darkar nga vel bak zanah hian ka mu meuh lo. Zing karah hnathawk turin ka chhuak a, chhunah class ka kal a, zanah football training ka nei leh ṭhin. Inah chau takin ka haw a, ka fapa infiampui leh a ngai a, nun hahthlak tak ni mah se nun awmzia min hrilhtu ṭangkai tak a ni lawi si. 

Kum naupangtein ngaihtuahna tak tak sen ka ngai a, ka ṭhianten zu inna hmuna chhuak tura min sawm lahin ka taksa peng zawng zawngte hi chhuah chakin za mah se ka chhuah a rem lo. Ka tan chauha nung thei ka ni tawh lo a, ka fapa ka ngaihtuah tel a ngai a ni. Nausenin kan chauh leh mut chhuak lam an ngaihtuah ve tawh bawk si lo!

Khawvel eng hmu tura keimah ngeiin nunna ka pek ka kawl tawh a, ka tan chuan a harsa takzet a ni. Football khelmuala thil thleng chu fate ngaihtuah luat avanga rilru hahna khaikhin a ralah chuan nep tak a ni. 

A chang chuan engvanga nui hmel pu reng nge ka nih, tih hi miin min zawt leh nawlh ṭhin. Kan tlawm zawh hnu lawkah te hian ka lo nui leh vur vur ṭhin - a chhan maw? Ka fapa a pian hnuah khan football hi thihna leh nunna lam a ni lo tih ka hriatchian em vang a ni. Football hi rilru hahna leh inhuatna thehdarhna tur a ni lo a, football chu a bik takin naupangte tan, hlimna leh phurna min petu a ni tur a ni. 

Ball te taktein midang nun a thlak danglam theihzia hi ka hre tawh a, a bik takin ka player Mo Salah, Sadio Mane, Roberto Firmino leh midang tam tak tana football-in hna a thawh hi ropui tak a ni. Germany-a ka hun tawn khirh tak kha anni hun tawn nen chuan khaikhin rual pawh a ni lo. Kawng lakah chawl mai thei an ni a, mahse an beidawng duh lo. 

Pathian an ni lo. Beiseina an neihte chu an tlawmsan ve lo mai chauh zawk a ni. Ka ngaihdan chuan football-a 98% hi chu hlawhchhamna kara hlimna leh lawmna nen hian a kal dun tlat a ni. 

Bul ka ṭantirh aṭang khan ka tihsual chu inzir nan ka hmang a, a hmasa ber kha ka theihnghilh ngai lo ang. Kum 2001 khan kum 10 ka khelh tawhna Mainz-ah coach hna ka thawk ṭan a, ka buaina chu player tam zawk kha ka ṭhian an la ni tlat a ni. 

Zan khat thil thuah an pu ka ni thut a, anni lah chuan “Kloppo” tiin min la ko lauh lauh bawk si. Ka match hmasa bera starting XI ka thlan chhuah ka hrilh dan kha ka la hre reng. An hmaichhan ngeia hrilh ka duh a, ka tisual tih ka inhre hma hle. 

Hotel room khatah player pahnih zel an riak a, pakhat a khelh tur thu hrilh a, pakhat bench-a a awm tur thu hrilh chu hrehawm tak a ni. "Kloppo ngatinge?" tiin mi an zawt a, a tam zawk ka chhang lo a, a chang chuan, "Player 11 chiahin bul an ṭan thei si a ni," tih chu chhanna a ni. 

Hetiang teh nuaih hi ka bul ṭan dan chu a ni ve mai a, mahse khang zawng zawng kha zirlai ropui tak a ni tho si. Manager ka nihna anga ka hlawhtlinna ropui ber pawh hi ka hlawhchhamna aṭanga ka hlawhchhuah a ni tlat. 

Champions League-a 3-0 a Barcelona kan ngam lohte kha, suangtuah theih piahlama result duhawm lo ber a ni hial ang. Mahse, second leg kan khelh dawna ka naute ka fuihna erawh tlang tak a ni.

Tactic chungchang chu ka sawi tam ber a ni a, thudik ka hrilh bawk. "Khawvela striker 

ṭha ber pawl pahnih tel loin kan khel dawn a, khawvel chuan hnehna kan chan theih an beisei lo. Dik takin sawi ila, thil theih loh ang hial a ni. Mahse, nangmahni in nih miau avangin chance kan nei tih ka hria a ni."

Ka thusawiah chuan ka rinna ka nghat tak tak. Footballer an nihna anga an thiamnaah chuan ka innghat tawh lo. Mahse, an mihring mihrinna chu ka innghahna a ni a, vawiin thleng tura harsatna an paltlang zozai ka hriatsak avangin beiseina ka nei a ni. 

"Kan hlawhchham a nih pawhin a mawi thei ang ber talin ni rawh se," tih hi ka sawi tel hram a, ka tan chuan thusawi awlsam tak a ni. Kei chu mual sir aṭanga lo au ve satliah mai ka ni a, mahse player tan chuan a harsa a ni. 

Mahse, an inpekna leh Anfield-a mipui 54,000 te avang khan theih loh chu kan ti ta. Hei hi football mawina chu a ni - mahni mai chuan kan ding chhuak thei ngai lo!

Vanduaithlak takin Champions League-a thil thleng duhawm ber erawh khami zan khan ka hmu lo a, Trent Alexander-Arnold-a corner kha ka hmu ve lo. Substitution siam tuma ka hawi let lai tak a ni a, ka hawi let chuan goal lut lai chiah ka hmu. 

Ben Woodburn ka en a, "Eng thil nge thleng hi?" a rawn ti a, kei lah chuan, "Ka hre nang," tih zawngin ka chhang! Anfield boruak chu pui tak a ni - theihnghilh theih loh pakhat ka nei. Ka assistant-in, "Substitution chu kan siam tlang dawn em?" a rawn tih kha. 

Kum 18 chhung chu manager ka ni ve ta a, minute maktaduai tel hi inkhel ka en tawh a, chumi karah chuan kha goal pawimawh em em kha ka hmu lo a nih chu! Video chuan vawi 500,000 ka en tling tawh hial ang. 

Match zawha ka inthlaknaa ka va lut kha ka la hre reng. Ngawi rengin tui ka in a, ka nui ver ver ringawt mai a ni. Kha zan ang em ema muttui kha ka la nei ngai lo. Nuam ber erawh zing ka harh a, a tak ngei a lo ni reng tih hriatna kha a ni. 

Cinema aia hmuhnawm awmchhun chu football hi ni maiin ka hria. Zing kan harh a, a hma zana magic kha a tak tak a lo ni reng tih hriat chu nuam deuh asin!

Nomawi nena Liverpool khawpui kan fan ṭumte kha aw... kha hlimna, lawmna leh hmangaihna kha tawng reng thei ila khawvel hi a nuam ngawtin ka ring ṭhin. 

Football hian ka mamawh zawng zawng min pe a, khawvel hnenah hian engemaw tak pek let ve ka duh. Juan Mata leh footballer dang tam takin an hlawh 1% mi harsa zawk tana an hlan hi ropui ka ti a, chu chu ka zawm ve ta a ni. 

He thil hi khawvela footballer ropui ber ber tih tur a ni bik kher lo a, football khawvela mi tam zawkin he 'Common Goal' movement hi an rawn zawm ve ka beisei tlat. 

Ṭhiante u, kan vannei takzet tih hi hai lo ila, khawvela naupang rethei zawkte ṭanpui hi kan tihtur a ni tih i hria ang u. He thil sawi hi hrehawm ka ti, mahse football aia buaina lian zawk hi a awm a, khelmual pawnah hian khawvel tak tak chu a awm a ni. Sum lakluh leh nomawi chawi ringawt aia lian zawk football hian a tum tur a ni. 

Kan vai hian kan hlawh 1% hi pe ni ila, khawvel danglamna hi kan thlen thei em em ang. Mi â tak, mumang atthlak tak neitu ang ka ni a ni mai thei. 

Mahse, hei hi ngaihtuah rawh. Football hi tu tan nge? "Beiseina neitute tan," tih hi a chhanna chu a ni tih kan hrechiang em em vek a ni. 



Share this Post

Login to comment
No Comments