Saina-i'n visa buaina a tawk

October 15 aṭangin badminton inelna ngaihhlut pakhat Denmark Open khelh a ni dawn a, tournament-a inlan tur Saina Nehwal chuan visa chungchangah harsatna a tawk a, tunah chuan sut kiansak a ni tawh.

Thawhṭanni thleng kha chuan Saina-i leh a trainer visa chu ngaihtuahsak an la ni lo. London Olympic bronze medalist chuan Twitter kaltlangin, "Kar leh mai hian Denmark-ah tournament khelh tur ka nei, kei leh ka trainer tan tun thlengin visa chu tih fel a la ni lo. 

"Karleh Thawhlehni maiah match ṭan a ni dawn, puihna ka dil a ni," a ti a, External Affairs minister Dr. S. Jaishankar hmuh ngei turin a dah. A dilna hi ngaihtuahsak niin, inelna hmachhawn turin an kal thei dawn.

Kum 29 mi Saina hi season hmasa khan BWF Super 750 tournament-ah hian pahnihna a ni, nomawi inchuhna inkhel hmuhnawm takah Chinese Taipei nula Tai Tzu-Ying a ngam lo, kuminah pawh beiseina a nei sang.



Share this Post

Login to comment
No Comments